खण्डः ३ - अध्यायः २०६

वज्र उवाच॥
भगवन्कर्मणा केन प्रज्ञायुक्तो भवेन्नरः॥
एतदेव मनुष्याणां मनुष्यत्वमुदाहृतम् ॥१॥
मार्कण्डेय उवाच॥
चैत्र्यां तु समतीतायां यावन्मासं दिनेदिने॥
पूर्ववत्पूजयेद्देवं नृसिंहमपराजितम् ॥२॥
होमं च प्रत्यहं कुर्यात्तथा सिद्धार्थकैर्नृप॥
ब्राह्मणान्भोजयेच्चात्र तथा त्रिमधुरं सदा ॥३॥
वैशाख्यां कनकं दद्यात्रिरात्रोपोषितो नरः॥
ज्ञानावाप्तिप्रदं ह्येतद्व्रतं बुद्धिविवर्धनम् ॥४॥
कृत्वा व्रतं मासमिदं मयोक्तमासाद्य नाकं सुचिरं मनुष्यः॥
मानुष्यमासाद्य च बुद्धियुक्तो ज्ञानेन युक्तश्च तथा भवेत्तु ॥५॥
इति श्रीविष्णुधर्मोत्तरे तृतीयखण्डे मार्कण्डेयवज्रसंवादे बुद्ध्यावाप्तिव्रतवर्णनो नाम षडुत्तरद्विशततमोऽध्यायः ॥२०६॥