खण्डः ३ - अध्यायः ०७६

वज्र उवाच॥
नरनारायणौ कार्यौ केन रूपेण संयुतौ॥
हरिः कृष्णश्च कर्तव्यः कथं वा भृगुनन्दन ॥१॥
मार्कण्डेय उवाच॥
दूर्वाश्यामो नरः कार्यो द्विभुजश्च महाभुज॥
नारायणश्चतुर्बाहुर्नीलोत्पलदलच्छविः ॥२॥
तयोर्मध्ये च बदरी कार्या फलविभूषणा॥
बदर्यामनु तौ कार्यावक्षमालाधरावुभौ ॥३॥
अष्टचक्रे स्थितौ याने भूतियुक्ते मनोहरे॥
कृष्णाजिनधरौ दान्तौ जटामण्डलधारिणौ ॥४॥
पादेन चैकेन रथस्थितेन पादेन चैकेन च जानुगेन॥
कार्यो हरिश्चात्र नरेण तुल्यः कृष्णोऽपि नारायणतुल्यमूर्तिः ॥५॥
इति श्रीविप्णुध०तृ०ख०मा० सं० नरनारायणरूपनिर्माणो नाम षट्सप्ततितमोऽध्यायः ॥७६॥