प्रभासक्षेत्र माहात्म्यम् - अध्याय ६३

 ॥ईश्वर उवाच॥
ततो गच्छेन्महादेवि भैरवेश्वरमुत्तमम् ॥
योगेश्वर्या दक्षिणतो नातिदूरे व्यवस्थितम् ॥१॥
सर्वपापप्रशमनं दिब्यैश्वर्यप्रदायकम्॥
पुरा दैत्यविनाशार्थं यदा देवी कृतोद्यमा ॥ ॥२॥
तदा भैरवमाहूय दूतत्वे नियुयोज ह ॥
शिवदूती तदा ख्याता पश्चाद्योगेश्वरीति च ॥३॥
भैरवो यत्र वै देव्या दूतत्वे विनियोजितः ॥
तेन लिंगं समाख्यातं भैरवेश्वरनामकम् ॥४॥
पूजितं देवदैत्यैश्च भैरवेण प्रतिष्ठितम् ॥
यस्तत्पूजयते भक्त्या कार्तिक्यां विधिना नरः ॥
निरंतरं वा षण्मासं सोऽभीष्टं लभते फलम् ॥५॥
इति श्रीस्कांदे महापुराण एकाशीतिसाहस्र्यां संहितायां सप्तमे प्रभासखण्डे प्रथमे प्रभासक्षेत्रमाहात्म्ये भैरवेश्वरमाहात्म्यवर्णनंनाम त्रिषष्टितमोऽध्याय ॥६३॥