खण्डः २ - अध्यायः ०१९

पुष्कर उवाच॥
कार्या पौरन्दरी शांतिः प्रागेवास्य पुरोधसा॥
प्राप्तेभिषेकदिवसे सोपवासः पुरोहितः ॥१॥
सोष्णीषः श्वेतवसनः सितचन्दनभूषितः॥
सितमाल्योपवीतश्च सर्वाभरणभूषितः ॥२॥
वेदिमुल्लिख्य यत्नेन कृत्वा च विधिवत्ततः॥
जुहुयाद्वैष्णवान्मन्त्रांस्तथा शाक्रान्विचक्षणः ॥३॥
सावित्रान्वैश्वदेवांश्च सौम्यां च विधिवत्ततः॥
शर्मवर्मगणं चैव तथा स्वस्त्ययनं गणम् ॥४॥
आयुष्यमभयं चैव तथा चैवापराजितम्॥
सपातवन्तं कलशं तथा कुर्याच्च काञ्चनम् ॥५॥
वह्नेर्दक्षिणपार्श्वस्थः श्वेतचन्दनभूषितः॥
श्वेतानुलेपनः स्रग्वी सर्वाभरणभूषितः ॥६॥
आसनस्थमुखं पश्येन्निमित्तानि हुताशने ॥७॥
पश्येयुरन्ये च तथा नृसिंह दैवज्ञवाक्यान्निपुणं स्वरूपम्॥
सांवत्सरस्याथ सदस्यमुख्याः सदस्यमुख्याश्च पुरोहितस्य ॥८ ॥
इति श्रीविष्णुधर्मोत्तरे द्वितीयखण्डे मार्कण्डेयवज्रसंवादे पुरंदरशांतिर्नामैकोनविंशतितमोऽध्यायः ॥१९॥