खण्डः २ - अध्यायः ००३

पुष्कर उवाच॥
सर्वलक्षणलक्षण्यो विनीतः प्रियदर्शनः॥
अदीर्घसूत्री धर्मात्मा जितक्रोधो जितेन्द्रियः ॥१॥
स्थूललक्षो महोत्साहः स्मितपूर्वाभिभाषकः॥
सुरूपः कुलसंपन्नः क्षिप्रकारी महाबलः ॥२॥
ब्रह्मण्यश्चाविसंवादी दृढभक्तिः प्रियंवदः॥
अलोलुपस्संयतवाग्गंभीरः प्रियदर्शनः ॥३॥
नातिदण्डो न निर्दण्डः चारचक्षुरजिह्मगः॥
व्यवहारे समः प्राप्ते पुत्रस्य रिपुणा सह ॥४॥
रथे गजेऽश्वे धनुषि व्यायामे च कृतश्रमः॥
उपवासतपःशीलो यज्ञयाजी गुरुप्रियः ॥५॥
मन्त्रिसांवत्सराधीनः समरेष्वनिवर्तकः॥
कालज्ञश्च कृतज्ञश्च नृविशेषज्ञ एव च ॥६॥
पूज्यं पूजयिता नित्यं दण्ड्यं दण्डयिता तथा॥
षाड्गुण्यस्य प्रयोक्ता च शक्त्युपेतस्तथैव च ॥७॥
उक्तैरनुक्तैस्तु गुणैरनेकैरलङ्कृतो भूमिपतिश्च कार्यः॥
सम्भूय राष्ट्रप्रवरैर्यथावद्राष्ट्रस्य रक्षार्थमदीनसत्त्वः ॥८॥
इति श्रीविष्णुधर्मोत्तरे द्वितीयखण्डे मार्कण्डेयवज्रसंवादे रामं प्रति पुष्करवाक्ये राजलक्षणं नाम तृतीयोऽध्यायः ॥३॥