मराठी मुख्य सूची|भारतीय शास्त्रे|योगशास्त्र|योगासने, बंध आणि क्रिया|

समकोणासन **

प्रत्येक आसनाच्या नावानंतर एक चिन्ह * दिले आहे. हे चिन्ह आसनाचा सोपेपणा-अवघडपणा (तीव्रता) सुचवतात.
एक चिन्ह म्हणजे आसन करायला सोपे, दोन चिन्ह म्हणजे आसन करायला थोडे अवघड, तर तीन चिन्हे म्हणजे आसन करायला जास्त अवघड, हे आसन कोणी जाणकारांच्या मार्गदर्शनानुसारच करावे.


(चित्र क्र.४७७)
सम म्हणजे सारखा. या आसनामध्ये दोन पाय दोन बाजूंना सरळ व ताठ पसरुन हात छातीसमोर जुळवले जातात. हे आसन हनुमानासनापेक्षा (चित्र क्र. ४७५) करावयास अवघड आहे. दोन्ही पाय आणि शरीराचा ओटीपोटाचा भाग हे या आसनात एका सरळ रेषेत असतात.

पध्दती
१. ताडासनात उभे राहा. (चित्र क्र.१) हात कंबरेवर ठेवा. आणि पाय तुम्हांला शक्य होतील तितके बाजूंना पसरा. (चित्र क्र. २९)
२. तळहात जमिनीवर टेका. (चित्र क्र.३०) आणि श्वास सोडून पाय हळूहळू अधिकाधिक दूर नेत शेवटी जमिनीवर बसा, व दोन्ही पाय दोन बाजूंना एका सरळ रेषेत पसरलेले असू द्या. दोन्ही पायांची संपूर्ण मागची बाजू विशेषत: दोन्ही गुडघ्यांची मागची बाजू जमिनीला भिडलेली असावी.
३. हात छातीच्या समोर जुळवा. (चित्र क्र.४७७) आणि या स्थितीत काही सेकंद राहा.
४. तळहात जमिनीवर टेका. कुल्ले वर उचला. आणि पाय हळूहळू जवळ आणीत उत्तानासनामध्ये (चित्र क्र. ४७) उभे राहा. त्यानंतर पुन्हा ताडासनात या. (चित्र क्र.१) आणि विसावा घ्या.

परिणाम
या आसनात मांडयांच्या सांधेला व्यायाम मिळतो आणि पायाची हालचाल सर्व दिशांना मुक्तपणे केली जाते. पाठीचा कणा ताणला जातो आणि पाठीच्या कण्याच्या खालच्या भागातला कसलाही दोष नाहीसा होतो. हनुमानासनाप्रमाणे (चित्र क्र.४७५) या आसनामुळेही पायाचे स्नायू सुदृढ बनतात आणि पायांना सुडौल आकार लाभतो. अंतर्गळाची वाढ या आसनामुळे थांबते आणि सायटिकाच्या वेदना नाहीशा होतात. ओटीपोट आणि जननेंद्रिये यामध्ये रक्ताभिसरण अधिक चांगल्या पध्दतीने होऊ लागते व ते भाग निरोगी राहातात.

N/A

References : N/A
Last Updated : September 12, 2020

Comments | अभिप्राय

Comments written here will be public after appropriate moderation.
Like us on Facebook to send us a private message.
TOP