निरालंब सर्वांगासन १ *

(चित्र क्र. २३६)
‘आलंब’ म्हणजे आधार किंवा टेकू आणि ‘नि:’ म्हणजे नाही. तेव्हा निरालंब म्हणजे, आधार किंवा टेकू नसलेले. सर्वांगसनाचा हा प्रकार आधीच्या दोन प्रकारापेक्षा अधिक कठिण आहे, कारण या आसनात शरीराला हातांचा आधार नसतो आणि शरीराचा भार व तोल या दोनही गोष्टी मान, पाठ आणि पोट यांच्या स्नायूंना सांभाळाव्या लागतात. व त्यामुळे हे स्नायू सुदृढ बनतात.

पध्दती
१. सालंब सर्वांगासन १ करा. (चित्र क्र. २२३)
२. हात सोडा. ते डोक्यावरुन मागे आणा. काटकोनात उभ्या असलेल्या शरीराच्या ज्या बाजूला डोके असेल त्या बाजूला हात जमिनीवर टेका आणि शरीर तोलून धरा. (चित्र क्र. २३६)
३. या आसनातही एक मिनिट राहाता येईल.