भारूड - होळी

१००५.
अवघेचि बोंबलती । होळी भोंवते भोविती ॥१॥
मायाहोळी प्रज्वळली । सृष्टि वेढारे लाविली ॥२॥
ज्याकारणे गुंडाळती । तेचि वाचे उच्चारती ॥३॥
होळीमध्ये खाजे आहे । ते तूं विचारुनि पाहे ॥४॥
खाजे खातां सुख होय । परी कठिण हातां नये ॥५॥
खोल दृष्टीने पाहिले । खाजे त्याच्या हातां आले ॥६॥
एक झडा घालूं जाती । लंडी चकचकून पळती ॥७॥
एक देहाचे पांगिले । ते आंगी हुर्पळले ॥८॥
उडी अवघ्यांचीच पडे । परि ते हातांसी न चढे ॥९॥
एके थोर धिंवसा केला । खाजे घेऊन पळाला ॥१०॥
एक आपणचि खाती । एक सकळांसि वांटती ॥११॥
एक घेऊन पळाले । परी कवंठी वरपडे जाले ॥१२॥
रामीरामदासी होळी । केली संसाराची धुळी ॥१३॥

१००६.
अझुनि काय रे दुश्चित । सावधान होईं आतां ॥१॥
नागविले योनीद्वारे । म्हणोनि बोंबलती पोरे ॥२॥
सकळ नाडियेले वोजे । अवघी एक बोंब गाजे ॥३॥
धूळी टाकिती मस्तकी । कोणी दाद घेईना की ॥४॥
राडी ऐसे नर्क होती । म्हणोनि प्रत्यक्ष दाविती ॥५॥
झोंबी लोंबी घेऊनि । जाती टाकिती नेऊनि ॥६॥
नेघे नेघे म्हणती बळी । बळे घालिती पाताळी ॥७॥
धरुनि अकस्मात नेती । अवघी कौतुक पाहती ॥८॥
तेथे असेना मर्यादा । थोर करिती आपदा ॥९॥
घरोघरी फेरे करिती । तैशा होति पुनरावृत्ति ॥१०॥
रामदास सांगे खूण । जावे संतासी शरण ॥११॥

१००७.
शिमग्याचा खेळ बोंबेचा सुकाळ । बोलणे बाष्कळ जेथे तेथे ॥१॥
जेथे तेथे भंड उभंड वाचाळी । राख माती धुळी शेणकाला ॥२॥
शेणकाला पाणी तडक मारिती । तेथे न्यायनीती कोठे आहे ॥३॥
आहे तेथे आहे विचारुनि पाहे । बाष्कळ न साहे नेमकासी ॥४॥
नेमकाचा संग भाग्याचा उदय । दास म्हणे जय प्राप्त होतो ॥५॥