२३८ .
गुरुसी शरण जावे जीवेभावे । वेदांत ऐकावे तन्मुखाने ॥१॥
यावत्काळ जाली नाही ते पूर्णता । तोंवरी अनंता अर्जावे हो ॥२॥
साधाकाणि सिद्ध पूर्ण तो तिसरा । लक्षणे अवधारा त्यांची मने ॥३॥
जनोक्ति साहोनी साधनी लुब्धला । साधक तो जाला योगापेक्षी ॥४॥
रामदास म्हणे सिद्धाची लक्षणे । ऐकतां चि ध्यान लागो ध्यासा ॥५॥
२३९ .
न व्हावे संन्यासी बाह्यवेषधारी । भार्या असुनी करी भिक्षुधर्म ॥१॥
विष्ठामूत्र करुनी क्षाळी हस्तपाद । मुखवाचा शोधे गंगेतटी ॥२॥
घटिका एक रात्र राहे तयावरी । ऐसे नित्य करी नेमालागी ॥३॥
घालोनि आसन बरवे बैसावे । स्तवन करावे जान्हवीचे ॥४॥
रामदास म्हणे अजपा संकल्प । करा नाश पाप केले तुमचे ॥५॥
२४० .
योगाभ्यास मग यथाशक्त्या करी । तुटे कर्मदोरी ज्या सेवने ॥१॥
ईडामार्गी वायु यथाशक्त्या ओढी । दडपावी गाढी तो कुंभक ॥२॥
पिंगळेच्या मार्गे सांडावे निश्वास । सुषुम्ना वेळ नाश होय जात ॥३॥
पिंगळे करावे युक्तीने पूरक । होईल कुंभक तितुका कीजे ॥४॥
रामदास म्हणे करावे रेचक । जेणे जाला एक प्राणायाम ॥५॥
२४१ .
ऐसे चढवितां चढे विशुद्ध जेव्हां । तुटे सर्व तेव्हां कर्मबंध ॥१॥
करावे ते स्नान वेदोक्तमंत्राने । त्रिपुंड्रधारण अष्ट स्थानी ॥२॥
भूशुद्धि भूतशुध्दि मातृकेचि न्यास । आरंभ संध्येस मग कीजे ॥३॥
शतत्रय जप गायत्रीचा कीजे । सहस्त्र जपिजे गुरुमंत्र ॥४॥
रामदास म्हणे यथाशक्ति मती । पुजावे श्रीपति मनी मूर्ती ॥५॥
२४२ .
करोनि पूजन वाचावे पुराण । श्रेष्ठ रामायण भागवत ॥१॥
स्तोत्र पाठ कीजे भिक्षेला मागतां । प्रिय तो अनंता येणे नेमे ॥२॥
आरंभ भिक्षेचा प्रहराचे वरी । मागावी घटिका चारी ग्रामामाजी ॥३॥
आणोनि ते अन्न भार्येसे अर्पावे । माध्यान्हीका जावे तीर्थावरी ॥४॥
रामदास म्हणे माध्यान्हीची विधि । आचरितां सिद्धि होय प्राण्या ॥५॥
२४३ .
जाऊनीयां तीर्थी स्नानासी करावे । त्रिपुंड्र धरावे द्वारावतिने ॥१॥
आसन मृगचर्म पात्र तो भोपळा । योगियाची कळा ऐसी धरिजे ॥२॥
माध्यान्हसंध्याणि सूर्यउपस्थान । जाल्या ब्रह्मयज्ञ मग कीजे ॥३॥
प्रतीक लक्षावा निर्मळ आकाशी । पृष्टी गभस्तीसी करोनियां ॥४॥
रामदास चिन्हे सांगे पुरुषाची । अवधी काळाची समजे तेणे ॥५॥
२४४ .
षण्मास मरण काळा तो पुरुष । होय देख त्यास निश्चयाने ॥१॥
नानावर्ण भासे उद्वेग होईल । पिंवळा रोगील भय लाली ॥२॥
दक्षिणभुजाहीन धर्मींचा तो नाश । थोडके आयुष्य राहील तो ॥३॥
वामभुजाहीन स्त्री षण्मासि जात । शिरहीन होत मरण मासी ॥४॥
रामदास म्हणे प्रतीक लक्षण । पाहोनि अवधान ठेवी काळा ॥५॥
२४५ .
इकडे भार्येने अन्न शिजवोनी । ठेवावे झांकुनी पति ये तो ॥१॥
माध्यान्ह सरोनि आश्रमासी यावे । देवासी करावे धूप दीप ॥२॥
नैवेद्य दावावे पदार्थ जो केला । श्रीवैश्वदेवाला मग कीजे ॥३॥
अतिथी पूजावा प्राप्त जाले द्वार । नाही हे उत्तर तया न कीजे ॥४॥
रामदास म्हणे प्रमाण सूत्राचे । घेतले लोकांचे खंडनार्थ ॥५॥
२४६ .
गोग्रास काढोनी कीजे भाग तीन । अतिथी आपण दोन घ्यावे ॥१॥
तिसरा जो भाग भार्येसि अर्पावा । अतिथी तर्पावा आर्ततेने ॥२॥
ग्रासोग्रासी राम म्हणत जेवावे । आंचवूनि घ्यावे तुळसीदळ ॥३॥
सरली ते भिक्षा स्तोत्रे जे उरली । पढावी त्या काळी शांत चित्ते ॥४॥
२४७ .
करावे स्तवन ऐकावे पुराण । शेष घडी तीन दिन राहेतो ॥१॥
क्षाळुनी पद हस्त संध्या आरंभावी । सरस्वती ध्यावी ब्रह्मदेवी ॥२॥
गभस्तिमंडळ नेत्राने लक्षावे । मरण पाहावे येणे आपुले ॥३॥
वर्ते उणे भासे षण्मासी मरण । तळी जरी न्युन मास तीन ॥४॥
रामदास म्हणे दक्षिणभागी उणे । दो मासी मरण हा नेम हो ॥५॥
२४८ .
वामभुजा कोरहि न दिसे जेव्हां । एकमासी तेव्हां मरण हो ॥१॥
मध्ये छिद्र देखे उरले दहा दिन । सधूम्रदर्शन उरले पांच ॥२॥
ज्वाळा निघे ऐसा गभस्ति अस्तासी । अवधी मरणाची प्रहर आठ ॥३॥
द्विशत गायत्री नियमे पढावी । मग ते म्हणावी रामरक्षा ॥४॥
रामदास म्हणे सायंकाळी कर्म । अतिप्त अति वर्म तेथिल हो ॥५॥