विष्णुस्मृतिः - अध्यायः ६९

नाष्टमीचतुर्दशीपञ्चदशीषु स्त्रियं उपेयात् ॥६९.१॥

न श्राद्धं भुक्त्वा ॥६९.२॥

न दत्त्वा ॥६९.३॥

नोपनिमन्त्रितः श्राद्धे ॥६९.४॥

न व्रती ॥६९.५॥

न दीक्षितः ॥६९.६॥

न देवायतनश्मशानशून्यालयेषु ॥६९.७॥

न वृक्षमूलेषु ॥६९.८॥

न दिवा ॥६९.९॥

न संध्ययोः ॥६९.१०॥

न मलिनां ॥६९.११॥

न मलिनः ॥६९.१२॥

नाभ्यक्तां ॥६९.१३॥

नाभ्यक्तः ॥६९.१४॥

न रोगार्तां ॥६९.१५॥

न रोगार्तः ॥६९.१६॥

न हीनाङ्गीं नाधिकाङ्गीं तथैव च वयोऽधिकाम् ।
नोपेयाद्गुर्विणीं नारीं दीर्घं आयुर्जिजीविषुः ॥६९.१७॥