जासूदाच्या मुला तुला सांगीती खाणाखुणा
पित्या माझ्या त्या दौलताचा नवा बुरुज वाडा जुना ।
काळी ग चंद्रकळा, काळी कसाई तिचं नाव
पित्या माझ्या दौलतांनी सारी धुंडीली गाव ।
जिवाला भारी जड माझ्या उशाला येलदोड
पित्या माझ्या दौलताची हिरवी मोटार वाडयापुढं ।
बंधुजी पावणा शेजी सांगत आली रंभा
बंधू माझाच्या भोजनाला घड केळीचा पिवळा आंबा ।
पोटीच पुत्र फळ देवाजी देता झाला
मेव्हणा राजसांनी ओटा शालूचा पसरीला ।
उन्हाच्या रखामधी चिमण्या कोठयाला येतीजाती
सयानू किती सांगू मला बयाची याद हुती ।
शेजारीणबाई बस म्हनाई व्हव तुला
माझ्या बयाची सव मला ।
भरील्या बाजारात काय करावं किराण्याला
सयानू किती सांगू बया असावी परान्याला ।
आईबापांनी दिली लेक आंबा ऊंबर तिच्या शेती
लाडकी एवढी लेक आईबापाला दुवा देती ।
आईबापान दिली लेक लेक देऊनी माग आला
तिच्या ग नशीबाचा धनी जामीन नाही झाला ।
अंबारीचा हत्ती भरल्या पेठत गेला रिता
लेकीच्या बापाला धाडा म्हणाया न्हाई सत्ता ।
बाळ सासर्याला जाती मागं फिरुन बघीना
माझा तो बंधुराया संग झडपाचा दागीना ।
काळी ग चंद्रकळा त्याचा पदर राम सिता
नेस म्हणती माझी माता घडी उघडीतो माझा पिता ।
सासू नी सासयिरा मला दिलं गोविंदानं
जाते सासरी आनंदानं ।
सासू नी सासर्याचा आशिर्वाद घ्यावा सून
पोटी फळाला काय उणं ।
सासू नी सासरा दोन्ही सोन्याची पाखरं
त्यांच्या हाताखाली आम्ही लोकांची लेकरं ।
आई परायास सासूबाईचा उपकार
सासूबाई मालनीन दिला प्रेमाचा चंद्रहार ।
आईबापाच्या पुण्याईन गाव नाशिक पाहिलं
नारळाच फळ कुशीवर्ताला वाहिलं ।
अंगणी माझ्या फुले गुलाब पानोपानी
सासर्याला गेली माझी जिवाची फुलराणी ।
अंगणी माझ्या आला आला मोगरा बहरा
सुकल्या फुलमाळा सई येईना माहेरा ।