TransLiteral Foundation
मराठी मुख्य सूची|मराठी साहित्य|लोकगीते|ओवी गीते : इतर|
संग्रह ७३

ओवीगीते - संग्रह ७३

सासर-माहेरविषयींच्या कल्पना ओवी गीतांतून गाऊन सामान्य स्त्रियांनी असामान्य जग उभे केले आहे.


ओवीगीते

आम्ही दोघी जावा आमुचं एक मत

नका घालू आडभिंत भाऊजीराया ।

सासर्‍याला जाती लेक लाडकी बापाची

तिजला घालवया सभा उठली लोकांची ।

सासर्‍याला जाती लेक भीमाशंकराची

तिला घालवाया येती हात भरुनी बिल्वराची ।

सासरी जाताना भर ग नवा चुडा

मायबाईनं तुला दिला कुंकवाचा पुडा ।

सासर्‍याला जाती बहीण भावाची लेकुरवाळी

बंधवाच्या हाती दुधाची ग शिंकाळी ।

सासर्‍याला जाता ऊन लागतं माझ्या बापा

दोन्ही अंगांनी लावू चाफा ।

सासर्‍याला जाता ऊन लागलं माझ्या आई

दोन्ही अंगांनी लावू जाई ।

माहेराची होते सारखी आठवण

आता मायबाई कधी धाडिशी बोलावणं ।

माहेराची वाट किती पहाते मी भारी

मायबाई माझी राहिली फार दुरी ।

माहेराची आठवण करीते मी नीट

मायबाई कधी होईल तुझी भेट ।

माहेरी जाताना लाजली चंद्रभागा

आता रखमाबाई भेट कधी होईल सांगा ।

माहेरी जाताना लागलं पंढरपूर

पाठी उभा राहिला शारंगधर ।

पड रे पावसा पिकू दे दाणापाणी

मग भावांना बहिणी आठवती ।

दळणं दळावं जसं हरणं पळतं

मायबाईचं दूध माझ्या मनगटी खेळतं ।

भाऊबीजे दिवशी भाऊ घालतो ओवाळणी

त्यानं ताटामधी टाकीला तन्मणी ।

भाऊबीजे दिवशी भावानं काय दिलं

आता मायबाई चंद्रहाराला मापलं ।

नणंद भावजयी आपण मारगी उभ्या राहू

हळदी कुंकावाच्या गोण्या खंडूनी नव्या घेऊ ।

नणंद भावजयी आपण सोनारवाडया जाऊ

कुंकवाच्या करंडयाला मोत्यांच्या जाळ्या लावू ।

नणंद ग भावजयी आपण अंगणी उभ्या राहू

एकेमेकींची शीण पाहू विहीणी दोघी होऊ ।

आईच्या माघारी लेक माहेरी जाते वेडी

पुरुषांना माया थोडी ।

सुखदुःखाचा कुठं गेला माझा पिता

बोलेनाशी झाला बंधू वसरी उभा होता ।

सुखदुःखाची कुठं गेली माझी बयाबाई

बोलेनाशी झाली गर्वदार भावजयी ।

भाऊ शिवी चोळी वहिनी डोळे मोडी

आता मायबाई तिच्या चोळीची काय गोडी ।

भाऊ शिवी चोळी भावजय दीना दोरा

आता वहिनीबाई तुझ्या चोळीचा नको तोरा ।

चिकनी सुपारी तुझ्या कंथाला आवडे

दिवा घेऊनी निवडे वहिनी बाई ।

Translation - भाषांतर
N/A

References : N/A
Last Updated : 2007-12-09T20:24:47.7670000

Comments | अभिप्राय

Comments written here will be public after appropriate moderation.
Like us on Facebook to send us a private message.

एक दाणा दोन फोडी, खाणाराची खोड मोडी

  • हा उखाणा आहे 
  • याचे उत्तर हरभरा असे आहे. काही ठिकाणी जेपाळ असेंहि उत्तर देतात. जेपाळाच्या दाण्यासहि दोन फोडी असतात व तो भयंकर रेचक असतो. म्हणच आहेः जेपाळाची मात्रा आणि स्वर्गाची यात्रा. 
RANDOM WORD

Did you know?

गणेशोत्सवाच्या काळात सत्यनारायण पूजा करावी काय? मग कोणती पूजा करावी?
Category : Hindu - Puja Vidhi
RANDOM QUESTION
Don't follow traditions blindly or ignore them. Don't assume a superstition either. Don't be intentionally ignorant. Ask us!!
Hindu customs are all about Symbolism. Let us tell you the thought behind those traditions.
Make Informed Religious decisions.

Status

  • Meanings in Dictionary: 717,490
  • Total Pages: 47,439
  • Dictionaries: 46
  • Hindi Pages: 4,555
  • Words in Dictionary: 325,863
  • Marathi Pages: 28,417
  • Tags: 2,707
  • English Pages: 234
  • Sanskrit Pages: 14,232
  • Other Pages: 1

Suggest a word!

Suggest new words or meaning to our dictionary!!

Our Mobile Site

Try our new mobile site!! Perfect for your on the go needs.