श्रीदुर्गाष्टोत्तरशतनामस्तोत्रम्

अथ श्रीदुर्गाष्टोत्तरशतनामस्तोत्रम् ।
ॐ दुर्गा शिवा महालक्ष्मीर्महागौरी च चण्डिका ।
सर्वज्ञा सर्वलोकेशा सर्वकर्मफलप्रदा ॥१ ॥

सर्वतीर्थमया पुण्या देवयोनिरयोनिजा ।
भूमिजा निर्गुणा चैवाधारशक्तिरनीश्वरा ॥२ ॥

निर्गुणा निरहङ्कारा सर्वगर्वविमर्दिनी ।
सर्वलोकप्रिया वाणी सर्वविद्याधिदेवता ॥३ ॥

पार्वती देवमाता च वनीशा विन्ध्यवासिनी ।
तेजोवती महामाता कोटिसूर्यसमप्रभा ॥४ ॥

देवता वह्निरूपा च सदौजा वर्णरूपिणी ।
गुणाश्रया गुणमयी गुणत्रयविवर्जिता ॥५ ॥

कर्मज्ञानप्रदा कान्ता सर्वसंहारकारिणी ।
धर्मज्ञाना धर्मनिष्ठा सर्वकर्मविवर्जिता ॥६ ॥

कामाक्षा कामसंहन्त्री कामक्रोधविवर्जिता ।
शाङ्करी शाम्भवी शान्ता चन्द्रसूर्याग्निलोचना ॥७ ॥

सुजया जयभूमिष्ठा जाह्नवी जनपूजिता ।
शास्त्रा शास्त्रमया नित्या शुभा चन्द्रार्धमस्तका ॥८ ॥

भारती भ्रामरी कल्पा कराली कृष्णपिङ्गला ।
ब्राह्मी नारायणी रौद्रा चन्द्रामृतपरिश्रुता ॥९ ॥

ज्येष्ठेन्दिरा महामाया जगत्सृष्ट्यादिकारिणी ।
ब्रह्माण्डकोटिसंस्थाना कामिनी कमलालया ॥१० ॥

कात्यायनी कलातीता कालसंहारकारिणी ।
योगिनिष्ठा योगिगम्या योगिध्येया तपस्विनी ॥११ ॥

ज्ञानरूपा निराकारा भक्ताभीष्टफलप्रदा ।
भूतात्मिका भूतमाता भूतेशा भूतधारिणी ॥१२ ॥

स्वधानारीमध्यगता षडाधारादिवर्तिनी ।
मोह्हिता शुभदा शुभ्रा सूक्ष्मा मात्रा निरालसा ॥१३ ॥

निम्नगा नीलसङ्काशा नित्यानन्दा हरा परा ।
सर्वज्ञानप्रदाऽनन्ता सत्या दुर्लभरूपिणी ।
सरस्वती सर्वगता सर्वाभीष्टप्रदायिनी ॥१४॥

॥ इति दुर्गाष्टोत्तरशतनामस्तोत्रं सम्पूर्णम् ॥

मूलदुर्गाष्टोत्तरशतनामस्तोत्रं