हनुमानाचीं पदें - १ ते ३

अभंग १ ला
पाटावांच्या करिती चिंध्या ॥ काय जाणती स्नानसंध्या ॥१॥
ज्याचें कपाळ ते हुलें ॥ त्यासीं परब्रम भुललें ॥२॥
लिखा अंडावरील खाती ॥ जैसी मर्कटाची जाती ॥३॥
पानफूल फळ खावें ॥ आपलें इंद्रिय चोखावें ॥४॥
नाहीं आचरविचार ॥ सदा प्रिय व्यभिचार ॥५॥
त्यांचें अवगुण न मानी ॥ तेही मिरविलें विमानीं ॥६॥
रामें तारिलें वानरां ॥ कैसा उद्धरिना नरा ॥७॥
सेतुंधनाच्या मिसें ॥ देवें सरतीं केलीं रिसें ॥८॥
आम्ही आहों नरपशु ॥ नाहीं पुण्याचा तो लेशु ॥९॥
मुख्य अंजनीसुत ॥ त्याचा म्हणवितो दूत ॥१०॥
आम्हांवरी कृपा पूर्ण ॥ समजे मध्वनाथ खूण ॥११॥

पद २ रें
विजयी माझा श्रीहनुमान । अंजनीनंदन शौर्यनिधान ॥ध्रु०॥
उपजत ज्यानें दिनमणि धरिला । आम्रफळाचा जाणुनि वान ॥१॥
अंतक कलयुगीं ताम्रमुखाचा । साचे सुग्रीवास प्रधान ॥२॥
कौपिन कटितटीं हाटकाचा । कपिकटकाचा मुख्य प्राण ॥३॥
घेउनि मुद्रा तरुनि समुद्रा । गेला आला हे महिमान् ॥४॥
अखया मारुनि लंकेशाला । दिधलें रंकाचें उपमान ॥५॥
वन विध्वंसुनी दशवदनाचा । केला दाटुनिया अपमान ॥६॥
जाळित सुटला नगरी तेव्हां । साह्य जाला तो पवमान ॥७॥
सीताशुद्धिस घेउनि आला । गौरवी जाला श्रीभगवान् ॥८॥
शोकविनाशक जानकीचा । म्हणउनी राघव दे बहुमान ॥९॥
द्रोणाचल रणीं घेउनी आला । वांचवी राघवबंधु सुजाण ॥१०॥
कपटी काळनेमीस निवटी । करुनि तपोवनिं तें जलपान ॥११॥
उपवासप्रिय तो शनिवारीं । दोषनिवारक तें अभिधान ॥१२॥
वज्रशरीरी कीर्तनीं उभा । श्रीरामाचें हें वरदान ॥१३॥                                                                                                                                                                                                                                                                                                                                                                                                                                                                        
त्रिभुवनिं ज्याला विषम न भासे । ब्रह्म सनातन सर्व समान ॥१४॥
मर्कट बळकट ब्रह्मचारी । धरि निजदासाचा अभिमान ॥१५॥
मध्वमुनीश्वर बलभीमाचा । अनुचर येथें कां अनुमान ॥१६॥

पद ३ रें
पहा नयनीं हनुमंत । ज्यासी वानिती महंत ॥ ज्याचा महिमा अनंत । मुख्य प्राण रामाचा ॥१॥
सदा बांधुनिया माज । करी राघवाचें काज ॥ ज्याचें शिरीं रघुराज । सेवक पूर्ण रामाचा ॥२॥
स्वामी रामाचें वहन । केलें लंकेचें दहन ॥ ज्याचें करणें गहन । बलभीम नामाचा ॥३॥
सर्वां देवांचा वरिष्ठ । वारी दासांचें अरिष्ट ॥ मध्वनाथीं एकनिष्ठ । मानिती हा नेमाचा ॥४॥