हाय हाय करु काय झाली आग अंगाची रे ।
उडिव मजा उट रतिसुख संगाची रे ॥ध्रु०॥
बहुत श्रमाने मोहममता जडली रे ।
म्हणुन सुसंगत तुझी माझि घडली रे ॥
आता कुणाची पडसावली पडली रे ।
कोण मनातुन प्रियकर आवडली रे ॥
स्वस्थपणे कोण एकांती सापडली रे ।
नाहक सख्या आग मजवर पाखडली रे ॥चाल॥
काय कधी तरी अशी सेवेस चुकले रे ।
विषय सुखाच्या कशी रसास मुकले रे ॥
तुझ्या वियोगे शरिराने सुकले रे ॥चाल॥
नव्हे नार मी वाइट ढंगाची रे ।
जाती घडी पहा एक एक रंगाची ॥१॥
फिदा सदा मन तुझे निजण्यावरते रे ।
ह्यासाठी परोपरी कसे आर्जव करते रे ॥
स्मरुन जिव्हाळा किती मरणी मरते रे ।
प्रहर प्रहर नित पलंगावर ठरते रे ॥
दृष्टि न पडता क्षणात घाबरते रे ।
भेट होता गळी मिठी मारुन धरते रे ॥चाल॥
ज्या दिशी नागा त्या दिशी तळमळते रे ।
स्वप्न अवस्थेमधी तिंदा गळते रे ॥
जागेपणी मग मनचे मनी जळते रे ॥चाल॥
रव रव रव करी सार्या सर्वांगाची रे ।
चोळी तडकली उरात भिंगाची रे ॥२॥
कामे करून मी-ना जरतर तरते रे ।
सगुण गुणांणा नातर अंतरते रे ॥
विषय अधी मग स्वकर्म नंतर ते रे ।
इतर काशांचे काय आवंतर ते रे ॥
दिव्य स्वरुप जे कसुन तंतर ते रे ।
जलदी आता कर पदरच हंतरते रे ॥चाल॥
सैल सो तरी मज मुठीत धरु दे रे ।
अशानेच मन समाधान करु दे रे ॥
मदन रगा ह्या त्वरित गती जिरुंदे रे ॥चाल॥
शपत तुला त्या जेजुरलिंगाची रे ।
किती कळ सोसू अजुन अनंगाची रे ॥३॥
सर्व सुखाहुन मोठे मैथुनसुख रे ।
आणिक दिसेना या एव्हढे दुःख रे ॥
कमरबस्त लागुदे मुखास मुख रे ।
क्षुधित कधी नये दवडू विन्मुख रे ॥
त्यात चालला आजवर सलूख रे ।
उगीच फिरशि का बारा मुलूख रे ॥चाल॥
गंगु हैबती भले शाहिर वरदी रे ।
गैर साल गुणी महादेव मरदी रे ॥
पुरा प्रभाकर कवनामधी दरदी रे ॥चाल॥
झोड उठे बीन मृदंद चंगाची रे ।
इच्छा करती गीत प्रसंगाची रे ॥४॥