कुठे रात्र कर्मिली आज सगुणसागरा ।
उभे राहुन एकांती वृत्तांत सांगा सारा ॥ध्रु०॥
दरबारचे नाव अरे प्राणसख्या सांगुनी ।
गेला छपरपलंगी रात्री मला त्यागुनी ॥
कुठे चिराबंद रुपवंती नार भोगुनी ।
आला नेत्र पुशित प्रियकरा घरा मागुनी ॥
बरे समाधान मज करिता आलिंगुनी ।
वैर्याची लोटली रात्र वृथाजागुनी ॥चाल॥
आता हसुन बसुन वरवर मुख कुरवाळीता ।
आला दिवस असा का जिव माझा जाळिता ।
कोरडेच कुच करी धरुन कवटाळिता ॥चाल॥
विश्रांत वेळ टाळिता अशि काय तर्हा ।
मसी नाडबंद राहुन जाशी परभारा ॥१॥
आवडिने एकाती कडेवर मज घेउनी ।
नित नग्न पलंगी करित होता नेउनी ॥
तांबूल मुखांतिल प्रसन्न मने देउनी ।
गुजगोष्टी करा की हो खुशीत मग येउनि ॥
घडो घडी स्तनावर कोमल कर ठेउनी ।
सौख्याचे सार शरिराचे सर्व सेउनी ॥चाल॥
आता दुरुन दुरुन पडद्याने शब्द बोलता ।
झिजविला देह किरे पहा पहा तुज खालता ।
रात्रींच्या कुठे कुठे तरि घिरट्या घालिता ॥चाल॥
आडवाट धरुन चालता हो प्राणेश्वरा ।
काळजी कांच शरिरांस हाच सकुमारा ॥२॥
काय काय आठवू हर्ष तुझ्यारे संगतिचा ।
नाही शब्द कधी रे बोललास वरकांतिचा ॥
अत्यंत तू माझा प्रियकर एकांतीचा ।
वाखाणू कोठवर गुण सगुणशांतिचा ॥
बोल तुझे सुघड तू पोपट विश्रांतिचा ।
भाससी अमोलिक थेत हेट प्रांतिचा ॥चाल॥
मरमरून जात तुजवरुन ह्रदयरंजना ।
हौसेच्या नगा कंदर्प अग्न भंजना ।
जिरशील कसारे मम लोचनिच्या अंजना ॥चाल॥
सजणा दृष्ट किरे होईल शाम सुंदरा ।
नको नटुनथटुन जाऊ नित्य उठुन परदारा ॥३॥
इछीले ते तू मज मनापासुन पुरविले ।
संगतिचे सौख्य सर्वात सदा मिरविले ॥
घेऊन मांडिवर पंचामृती भरविले ।
बैसल्या रुसुन समजाउनी मन मुरविले ॥
सोन्याचे दिवस दाखवून दुःख हरविले ।
अलिकडेच कोण्या सवतिने विपट करविले ॥चाल॥
असो कळेल तिथे तुम्ही खुशाल मौजा करा ॥
पुरे दृष्टी भरुन पाहिल्या तुला रे प्रियकरा ॥
करी कवन गंगु हैबती शुद्ध शर्करा ॥चाल॥
महादेव गुणी गुणिराज गुणीजन पुरा ।
कल्पना घेउन करी छंद प्रभाकर तारा ॥४॥