TransLiteral Foundation
मराठी मुख्य सूची|मराठी पुस्तके|श्रीज्ञानेश्वरांची गाथा|
अभंग १२३ ते १२८

पाईक - अभंग १२३ ते १२८

श्रीज्ञानेश्वर महाराजांची गाथा म्हणजे विठ्ठल प्राप्तीचा एक सोपा मार्ग. यात विठ्ठ्लाच्या सगुणनिर्गुण रूपाचे मोहक वर्णन केलेले आहे.


पाईक

१२३

जालेनि पाईकें गोसाविपण जिंके ।

परि स्वामिया सेवक साचा होय ॥

एकएकेविणें स्वामीसेवकपण ।

मिरविती हे खुण स्वामी जाणे ॥१॥

पाईक काय स्वामी स्वामिया काय पाईक ।

असतां एके एक दोन्ही नव्हती ॥२॥

स्वामीचें काज पाईकपणें वोज ।

करितां होय चोज पैं गा ॥

बापरखुमादेविवरा विठ्ठलासि वोळगतां ।

पाईका स्वामी असतां निवृत्ति ऐसा ॥३॥

१२४

एकुचि एकला जाला पैं दुसरा ।

एकीमेकी सुंदरा खेळविती ॥१॥

माझिये कडिये कान्हा तुझिये कडिये कान्हा ।

देवकी यशोदा विस्मो करिती मना ॥२॥

बापरखुमादेविवरु आवडे मना ।

जगत्रजिवनु कान्हा बाईयांनो ॥३॥

१२५

पाईका मोल नाहीं देसील तें काई ।

पाईक न मागे कांही भोग्य जात ॥१॥

देसील तें काई न देसील तें काई ।

पाईक न मागें कांहीं तुजवांचोनी ॥२॥

बापरखुमादेविवर विठ्ठलाच्या पायीं ।

पाईका मोल नाहीं तैसें जालें ॥३॥

१२६

आणिक पाईक मोलाचे तुझे ।

तैसें नव्हे माझें पाईकपण ॥१॥

न मगे वही मोल जीवन भातें ।

तें द्यावें मातें पाईकपण ॥२॥

बापरखुमादेविवरा गोसांविया ।

पाईकपणें मीयां जोडलेती ॥३॥

१२७

देह दंडुनि पाईक अनुसरसा जीवें ।

तव स्वामियाचें गूज हातासि आलें ॥१॥

पाईकपण गेलें स्वामि होऊनि ठेले ।

परि नाहीं विसरलें स्वामियातें ॥२॥

पाईकपणें ऐसा आठवुचि नांहीं ।

स्वामीवांचुनि कांही जाणेचिना ॥३॥

बापरखुमादेविवरु विठोजी उदारु ।

पाईक वो साचारु स्वामी केला ॥४॥

१२८

जागतां नीज आलें असें हातां ।

मग पाईक म्हणवितां लाज वाटे ॥

नव्हे कोणाजोगा नाईकें हाणितलें ।

उणेपणें आलें पाईकपणा ॥१॥

पाईक शुध्दमति स्वामिया विवेकी ।

वेंव्हारु लोकिकीं चाळीतु असे ॥२॥

निदसुरा होता तो जागसुदा जाला ।

स्वामिये आणिला आपणापाशीं ॥३॥

पाईकपणें गेलें सन्निधान जालें ।

स्वामी एका बोलें निवांत ठेला ॥४॥

मागावें तितुकें खुंटलें ।

तेथ न मगतां आपणांते जाणीतलें ।

बापरखुमादेविवरा विठ्ठला प्रसादें ॥

पाईक परि अभेदें उरला असें ॥५॥

Translation - भाषांतर
N/A

References : N/A
Last Updated : 2010-02-25T09:59:22.0870000

Comments | अभिप्राय

Comments written here will be public after appropriate moderation.
Like us on Facebook to send us a private message.

घणसर

  • स्त्री. ( बे . ) केकताड ; एक प्रकारची वनस्पति ; घायपात . 
  • a  Thickish, coarsish. Thronged. 
RANDOM WORD

Did you know?

देवाचे तीर्थ ग्रहण करण्यासंबंधी शास्त्रीय संकेत कोणते?
Category : Hindu - Puja Vidhi
RANDOM QUESTION
Don't follow traditions blindly or ignore them. Don't assume a superstition either. Don't be intentionally ignorant. Ask us!!
Hindu customs are all about Symbolism. Let us tell you the thought behind those traditions.
Make Informed Religious decisions.

Featured site