प्रथमांशुः - कर्णवेधः

ज्योतिर्निबन्धे - गर्गः - मासे षष्ठे सप्तमे वाऽप्यष्टमे मासि वत्सरे । कर्णवेधं प्रशंसंति पुष्ट्यायुः श्रीविवृद्धये । व्यासः - कार्तिके पौषमासे वा चैत्रे वा फाल्गुनेऽपि वा । कर्णवेधं प्रशंसंति शुक्लपक्षे शुभे दिने । स च मृगार्द्रा हस्तचित्रापुनर्वसुपुष्यश्रवणधनिष्ठारेवतीषु रिक्तापर्ववर्जतिथौ कार्यः । सौवर्णीं राजपुत्रस्य राजती विप्रवैश्ययोः । शूद्रस्य चायसी सूची मध्यामाष्टांगुलात्मिका ॥ पुंसः प्रथमं दक्षिणं कर्णं विध्येत् । स्त्रियः वामम् । इति कर्णवेधः ॥