प्रथमांशुः - पुंसवनप्रयोगः

द्वितीये तृतीये चतुर्थे वा मासे पुंनक्षत्रे चंद्रताराबलान्विते शुभे दिने भर्ताऽभ्यंगस्नातः आचम्य देशकालौ स्मृत्वा अस्यां मम भार्यायां जनिष्यमाणगर्भस्य पुंरुपताप्राप्त्यर्थं बीजगर्भसमुद्भवैनोनिबर्हणार्थं च श्रीपरमेश्वरप्रीत्यर्थं पुंसवनं करिष्ये । तदंगत्वेनादौ गणपतिपूजनं पुण्याहवाचनं मातृकापूजनं नांदीश्राद्धं च करिष्ये इति संकल्प्य तानि कृत्वा समानवर्णसवत्साया गोर्दधि पत्न्या दक्षिणपाणौ दत्वा तन्मध्ये प्रागग्रं यवं तत्पार्श्वयोर्द्वौ माषौ निधाय ‘ किं पिबसि ’ इति पत्नीं त्रिः पृच्छेत् सा तु ‘ पुंसवनं पुंसवनं पुंसवनं ’ इति त्रिरुक्त्वा प्राश्नीयात् । एवं त्रिवारं कुर्यात् । ततो ब्राह्मणान् संपूज्य दक्षिणां दत्वा आशिषो गृहीत्वा नीराजनादि कुर्यात् ॥ इति कृत्यदिवाकरे पुंसवनम् ॥