श्रीनारदभक्तिसूत्रें - सूत्र २२

श्रीकृष्ण प्रत्यक्ष ईश्वर । ऐसा मनीं दृढ निर्धार । शंका नये अणुमात्र । अद्भुत चरित्र देखतां ॥२५०॥
पूतनेचें केलें शोषण । शकटासुरांचे निर्मूलन । कालियाचें करून दमन । गोवर्धन उचलिला ॥२५१॥
दावाग्निपासून रक्षण । गोपगणाचें सांत्वन । करूनि आपत्तीचें निवारण । साक्ष सकलां दावितसे ॥२५२॥
दिसे तरी बालमूर्ति । कोमलांग शरीराकृति । नयनमनोहर कांति । अनंगासी लाजवी ॥२५३॥
परि सामर्थ्याची तुलना । करितां न करवे कोणा । ईश्वर प्रत्यक्ष हाचि जाणा । ऐसें सर्वत्र बोलती ॥२५४॥
गोपस्त्रिया भाळ्याभोळ्या । भावार्थानें अनुसरल्या । त्याही बोलों चालों विसरल्या । ईश्वरसामर्थ्य जाणोनि ॥२५५॥
श्रीकृष्ण प्रत्यक्ष ईश्वर । त्याहूनि नाहीं आणिक थोर । ऐसा मनीं दृढ निर्धार । सर्वकाळ सर्वांचा ॥२५६॥
कृष्णवेगळा नाहीं धर्म । कृष्णावेगळें नाहीं कर्म । कृष्णाविरहित नाहीं नेम । पाप पुण्य कृष्णात्मक ॥२५७॥
अखंड कृष्णध्यान हृदयीं । तेणें कृष्णरूप झाल्या पाहीं । देहगेहाची स्मृति नाहीं । कर्माकर्मा वेगळया ॥२५८॥
एसी कृष्णमय झाली स्थिति । देहभाव विवर्जित गति । देहीं असोनि विदेह स्थिति । अंतर्यामीं बाणली ॥२५९॥