माधव जूलियन - माझी बाहुली

[छन्द भुवनसुन्दर]

नाना, बाहुली माझी
बघा कोनाडयामाजी
तिला पिसांची गादी
तिची रेशमी साडी
तिला जरीचा काठ
बघा राणीचा थाट
शोभे श्रीमन्ती हिला
रङग महालीं निळा
नाही चढेल हट्टी
हिची कोणाशी गट्टी ? १

तोण्ड पाहून लाजे
फूल गुलाबी ताजें
दात कुन्दाच्या कळ्या
गालीं सुन्दर खळ्या
काळे ट्पोर डोळे
भारी लाडिक भोळे
नाक चाफ्याची कळी
ओठ दोन पोवळीं
शब्द दिसती ओठीं
पण अबोल मोठी. २

ठेवा ऐकटी घरीं
धीट आनन्दी परी
थो थो काजळ घाला
नाही पाणी डोळ्याला
निजे पुढयांत माझ्या
कधी वाजेना बाजा
पोर गुणाची खाणी
व्हावी कुणाची राणी ?
हिला आणा ना राजा -
नाना, हासतां का ? जा ! ३

ता. २९ ऑगस्ट १९२७