पाहिलेस नेत्राने जरासे कुच ठेवशील उघडे ।
इच्छा आमची पूर्वी फिरून आम्ही न येऊ फांकडे ॥ध्रु०॥
नवरत्नामधि चंद्र पाहिला तेजस्वी आनवा ।
नवीन आलिस पाहण्यात शेहेर पुण्यामधि बुट नवा ॥
आम्ही आपुल्या चित्तांत इच्छीतो ताहे सारिखा जवा ।
तु अज्ञानामधे तुझी खुण ही ठाऊक तुच्छा जीवा ॥
तुसि करावा इष्क आता तू दे शकुन उजवा ।
तोंड भरून गोड बोल जैसा निरशा दुधाचा स्त्रवा ॥
तिसरा महिना भरत आला श्रम करिता माशुकडे ॥१॥
उत्तरसी प्रति उत्तर व्हावे निजलीस का जागी ।
बौध्यरूपी बोललिस नसावी चतुराई आंगी ॥
काय आम्ही बोललो मनन कर मैंदपणा त्यागी ।
परमेश्वरे दिधले हात पाय मग का व्हावी पांगी ॥
प्रित करावी चतुर गुणस्त गुणरस रंगी ।
अमृत फळ त्यागुन शुद्ध खातीस पिकली वांगी ॥
तुझ्या दिलाची गोष्ट राग नको येउ देऊ गडे ॥२॥
धर्मन्याय सांगितला ऐकता चित्ती हर्षावे ।
मान्य करून उपचारे गुणिचे गुण घेत असावे ॥
कल्पवृक्ष पाहुन शितळ छायेखाली बसावे ।
त्यातील सारांश तो सुज्ञानांस पुसावे ॥
शिजवुनिया शरीरास आपुल्या अहो प्राण विसावे ।
तेव्हा आपण एकवेळ प्राण मित्रावर रुसावे ॥
पायाशुद्ध स्त्रियाची लक्षणे सांगितले उघडे ॥३॥
माझी एक विनंती ऐकुनि घ्यावी मजसाठी ।
आसे नवे आसे वर्तावे सांगितल्या गोष्टी ॥
संतोष मजला झाला हे गुण आहेत तुझे पोटी ।
प्रित साधी लोभ विनोद की घडून येईल दृष्टी ॥
हे उत्तर भंगील हा दोष ज्याचा त्या कडे ।
सगनभाऊ म्हणे सुखी असावे सोन्याचे चुडे ॥४॥