लाड लाड येते येते मनरंजना ।
उचलुन कडेवर का घ्याना ॥ध्रु०॥
दासी मी तुमची तुमची निरंतर ।
येउन बसते मांडीवर ॥
असु द्या ममता ममता मजवर ।
उभी लाजुन सन्मुख पदर ॥
तुम्ही तर माझे माझे सरदार ।
शरिर नाजुक माझे फार ॥
उष्णता भारी भारी झोप येईना ॥१॥
चमकत येते येते सरदार ।
आंगावर लखलखाट जवहार ॥
नेसली शालु उंच पैठणीचा बहार ।
पदर दीड मजली जरतार ॥
विनंती करिते करिते मी उत्तर ।
ठेउन मस्तक चरणावर ॥
तोंड गोड बोला सखि सजना ॥२॥
समजल्या आंत्री आंत्री राजबनसी ।
धरि कवटाळुनि पोटासी ॥
नको हो हात लावू लावू आंगासी ।
दिवस तिसरा मी सीवनीशी ॥
उद्या मी न्हाइन न्हाइन चवथे दिवशी ।
डाग पडला आंगवस्त्रासी ।
गोळा करू द्या करू द्या बिच्छोना ॥३॥
न्हाउन मी आले पातळ नेसुन ।
नीर्याचा घोळ हाती धरून ॥
गेला रंग महाली महाली आनंदान ।
उभयपक्षी करी भाषण ॥
हळु हळु म्हणते सांभाळुन ।
दुखवाल कंबर सरसरून ॥
जीवाकडे पाहाता पाहाता हैराण ।
जणो तुमची निजणे बसणे ॥
सगन म्हणे आता विडा बसुन घ्याना ।
उचलुन कडेवर घ्या ना ॥४॥