तू रत्न माझे गूणी सद्गुणी बाळपणीचा गडी ॥
इष्कबाज जहराची पूडी ॥ध्रु०॥
रत्नागर सागरा आगरा मम कंठीचा मणी ॥
आहे पण जाणेल तो तन्मणी ॥
प्रित परीक्षा करून बोलते सतगतीत होउनी ॥
बसावे स्वस्थ सिंहासनी ॥
पंचाक्षरी सारखे बरोबर सांगावे साजणी ॥
घडल असले पुरवीचे ऋणी ॥चाल॥
तुम्ही सुखसागर मी स्मरते इंद्रायणी ॥
तुम्ही लाल गौर मी तुमची मृगलोचनी ॥
तुम्हि बाच्छाय मी आलबी चंद्र वदनी ॥
तुम्हि चंद्र मी चांदणी उभयताहि सोन्याची घडी ॥
सुफळ जाउ द्या उजवी गूढी ॥१॥
आरक्त नेत्र नका करू मी तुमची शकुनवंती ॥
प्रित आक्षरे धरावी चित्ती ॥
प्रधानकन्या पुत्र सावकाराचा लक्ष्मीपती ॥
नगर पुण्यशहर चंपावती ॥
शिरच्छेद करावा हुकूम राजाचा निश्चीती ॥
वजिरकन्येसी दुति सांगती ॥चाल॥
पुरुषाचा वेष जाले स्वार तुरुंगावर ॥
त्या रणांगणी घुसली जाउन सुंदर ॥
पी पाणी सख्या पाहुन घे डोळेभर ॥
राजा म्हणे प्रधानपुरुष का स्त्री सांग आवडी ॥
खोंचला प्रधान मनि चरफडी ॥२॥
तिसरी विनंती कसी महाराजा सांगे सख्याला सखे ॥
प्रित लेले मजनुसारखे ॥
धर्माची प्रित नव्हे पाक मोहंबत सत्ता सारखी उभयता अपले घर्चे सुखी ॥
नित्य काळ बागामधे जावे त्रयोदश विडे मुखी ॥
मुखोवटा सूर्यबिंब लखलखी ॥चाल॥
तक्ता गुलाल खूष रंग पाहुन ठरियेले ॥
कौतुक पहायासी नगरलोक भरियेले ॥
थाट करून लैलैसे पाचारिले ॥
वृत्तीला मोहिले दुजेपण काय त्याजमधे गोडी ॥
किर्त अपकिर्त जगी केवढी ॥३॥
चौथी विनंती कसी महाराजा नाही तुम्ही ऐकिली ॥
प्रित माझी स्वामिनी पाहिली ॥
भ्रतारा आधी भोग देइन म्हुन राजकन्या बोलली ॥
वांज पुत्रास भांक दिधलीत अश्वीनीवर स्वार पतीबरोबर दोघे चालली ॥
टेकडीवर कोपी पाहिली ॥चाल॥
कुळदैवत माझे पतिरायासी म्हणत क्षण एक ठरा दर्शन येते घेऊन ॥
पति पाहातो आली सख्याला भोग देउन ॥
सगनभाऊ म्हणे रामा मनाच्या आनंत तरंग बोढी ॥
करा वीठ्ठल पंढरिचा गडी ॥४॥