नाव तुझे साळू चल आज खेळू उभी द्वारी नार नखर्याची ।
चाल तुझी मर्हाट मोळ्याची ॥ध्रु०॥
नको वर पाहु दुरदूर जाऊ गाठ पडली आज बोल जरा ।
प्रितीचा लाउन तोरा ॥
नाकि नथ हलती नागिन डूलती श्रृंगाराचा काय नखरा ।
कधि होइल संकेत खरा ॥
फार दिस झाले न्हाण तुज आले करू दे गडे आज इष्क पुरा ।
सुभक चांदण्यामधे ठरा ॥
कधि गडे येसी भेटून जासिल खुणगाठ आपले आंतरची ॥१॥
कुंकु कपाळी राजसबाळी बांधा बिन अरवा ॥
बुचड्यामधे खोऊन मरवा ॥
पेंडे तन्मणी जीवलग गडणी शालु नेसुन आज हिरवा ।
सजणाकडे मोहरा फिरवा ॥
घडिभर जाऊ दर्शन घेऊ बोलू त्यासी बेपर्वा ।
भेट सख्याची आज कर्वा ॥
लई मन मिळले नाही कधी टळले आण घाला माझ्या रक्ताची ॥२॥
चंचळ मैना बांधुन पैना आली सजनाला भेटाया ।
चला उभयता रंग पाह्या ॥
राजसरूपडे जिवीचे ठिकडे भेटताच लागन पाया ।
आहे मजवर त्याची माया ॥
आड पडद्याने बहु युक्तिने मुख कुर्वाळिन पतिराया ।
तप्त शरिर जाहली काया ॥
घ्या मांडीवर मला हो कवळून आग्न जाहली आज विषयाची ॥३॥
रंगमहालात पलंग फुलात गुलाबदाण्या तबके भरून ।
उजवा हात स्वामिचा धरून ॥
आडपडद्याने बहु युक्तीने सजन मोहिला प्रिती करून ।
आनंदवृत्तिने वसा ठरून ॥
राग रंग नित्य असावा नार सजनाचा पदर धरून ।
गाई सगन चाल करून ॥
प्रित उभयता मजवर ममता असावी या प्रभुरायाची ।
चाल तुझी मर्हाट मोळ्याची ॥४॥