शिमगा

१.
दरवा भरला काठोकाठीं पाणी चाललय ग गजरेला ।
दादरावरले राईबाई तुझ्या गजर्‍याचं मोल काय ।
सवा रुपया दोन आणे देऊं काय ।
गाडी आली भवर्‍याची ।
माझ्या बाबईबाईच्या नवर्‍याची
गाडी आली भवर्‍याची ।
माझ्या कस्तुरीच्या दिराची ।
गाडी आली भवर्‍याची ।
माझ्य़ा डाळुंबीबाईच्या सासर्‍याची ।
गाडी आली भवर्‍याची ।
माझ्या आबुबाईच्या सासूची ।
२ .
रामा हो रामा रामाच्या बागेमधीं हो मधीं ।
चवरा मोठा दोन्ही वो दोन्ही ।
आंब्याची सावली चींचेवरी ।
जाईला पाणी जातया झूळझुळवाणी ।
आंब्याची सावली चींचेवरी ।
रामाचं ध्यान गेलं सीतेवरी ।
रामा रामा हो रामाच्या बागेमधीं हो मधीं ।
चवरा मोठा दोन्ही वो दोन्ही ।
जाईला पाणी जातया झुळझुळ वाणी ।
बोराची सावळी पेरुवरी ।
रामाचं ध्यान गेलं सीतेवरी ।