लोकगीत - गीत अठरावे

काळ्या गाईचं दूध चांगलं । जेव तूं कृष्ण जेव तूं बाळ ।
कृष्ण गवळ्याची राई । देग कृष्णाची चेंडूफळी ।
चेंडुफळी झुगारली । जाऊन पडली कडम डहाळी ।
चेंडूफळी उचलली । गोविंदा धावत पळत ।
आला मातेच्या महालांत । दिली राईनें चेंडूफळी ।
गेला गोविंदा खेळाया । चेंडूफळी या घेउनी ।
डाव मांडिला खेळण्याचा । राई धावत पळत ।
राई -  आम्हाला घ्या हो खेळांत । गोविंदा बाळ बोलत ।
" नाही घेत खेळांत ।" "मी नाहीं दियाची खेळूनी।"
आला बापाच्या महालाला । बापा धावत पळत ।
राई बोलती झाली या । सांगू लागली बापाला ।
बाप बोलाया लागला । "घेरे राईला खेळांत ।"
"नको आमुच्या खेळांत ।"
हातांतली अंगुठी । देत झाली गोविंदाला ।
"आतां येते मी खेळांत "। "ये ग अमुच्या खेळांत ।"
दोघे लागले खेळायला । दोघे निघाले खेळूनी ।
आले आपल्या वाडयाला । खेळ खल्लास झाला ।
हारतुरा आणुन दिला ।राईच्या हातांत ।