आनंदी - प्रवासी

ही शांत वेळ दिसते बहु सौख्यदायी
हा भागुनी अरुणा अस्तगिरीस जाई
हा भागला पवन शीतल मंद आहे
हा वृक्षसंघहि अतीव निवांत आहे १

सायंकाळीं उलुनि कलिका वास जो रम्य येत
त्या वासाला भुलुन मन हें सौख्यदायीच होत
पक्षी वृक्षावरति बसुनी गोडसें गीत गाती
नाना शब्दां अळवुनि किती मंदिरा शीव्र जाती २

भक्ष्यशोधन तें सर्व सोडुनीयां
सुखें विहराया जमति एक ठाया
उठें सर्वांचा शब्द मजेदार
तयें पांथस्था सौख्य होत फार ३

वृक्ष असती घनदाट सभोंतीं हे
वनश्रींचें उद्यान गमे आहे
हरित वस्त्रा नेसोनि मही छान
सुखवि माझ्यापरि वाटसरा जाण ४

भव्य मंदिर ही भूमि गमे मातें
लावियलें नभ छतचि हें तयातें
असति झुंबर हें चंदसूर्य त्याला
सर्व निर्मियलें आमुच्या सुखाला ५

असे आनंदी सर्व जरी त्यातें
ईशकरणी आनंदमयचि होते
असे दु:खी जो त्यास दिसे दु:ख
रहा आनंदी सर्व तुला सौख्य ६