TransLiteral Foundation
Don't follow traditions blindly or don't assume a superstition either.
Don't be intentionally ignorant. Ask us!! Make Informed Religious Decisions!!
मराठी मुख्य सूची|मराठी साहित्य|गाणी व कविता|बालकवी|
ये, ये, ये आई, ये बाई, रज...

रजनीस आवाहन - ये, ये, ये आई, ये बाई, रज...

बालकवी ऊर्फ त्र्यंबक बापूजी ठोंबरे (इ.स. १८९०-इ.स. १९१८) यांचा मराठीतील सर्वश्रेष्ठ निसर्गकवी म्हणून यथार्थ गौरव केला जातो.


रजनीस आवाहन
ये, ये, ये आई, ये बाई, रजनिमुखी लवलाही;
मजला पाहूं दे, स्वानंदें, कृष्ण तमीं नभ कोंदे.
वाहूं दे वारे, त्यांतून, दिव्य शांति घेऊन;
दुर्धर कर्कश गे, या बसली, कर्णसंपुटीं टाळी;
एकहि धड नाद, येईना, ऐकाया श्रवणांना.
नसता कल्लोल, दिवसाचा अवघा स्वार्थ चराचा,
घालवुनी आतां, ये येथें शांति स्थापित हातें.
हृदयाचे बोल. बहुमोल, खोल मनांतिल खोल,
ऐकूं दे वाणी, हृदयाची, माझी मज.
माझ्या हृदयींचा, विश्वास, नाचवुं दे विश्वास;
माझ्या हृदयाचे, नाचच ते, परिसूं दे श्रवणांतें,
माझ्या नयनांच्या, किरणांनीं, मदहृदया पाजळुनी,
लावुनि निज हातीं, दे, दे ती, स्वयंप्रकाशा प्रीति.
दिवसांचें तेज, तेज तया, लाजे चित्त म्हणाया;
दिवसाचा घोर अंधार. बसवी झांपड पार !
दिपवी नयनांना, दाखवुनी, अनंत दु:खें नयनीं,
संशय काहूर करि हृदयीं, स्वास्थ्य क्षणभर नाहीं.
आत्मा होऊनिया निभ्रांत, मूर्च्छित होय मनांत,
वारें उष्ण फिरे वणव्यांत, दग्ध मना जाळीत !
तेलच मग ओती, त्यावरतीं, रविप्रभा निज हातीं.
जळफळतें सारें, धगधगुनी, अशांतिच्या वणव्यांनीं,
ये, ये, ये देवी, दे हृदयीं, प्रेमा विकसन बाई !
अनंत दिव्य कणीं, पसरोनी, अनंतत्व दे गगनीं.
फुंकारें आधीं, दूर करी, रविप्रभा ही सारी,
मग ‘ला, ला’ गाणीं, गावोनी, बाहय जगा निजवोनी,
कर अंधाराचा, पाऊस, पाडुनि शांत जगास.
ते सगळे नाद, नि:पात, बुडवुनि सप्त तळांत !
राज्य करीं जगतीं, घेऊन ती, शांतिपताका हातीं.
आतुर गे डोळे, बघण्याला, रूप तुझें अवलीळा
व्योमीं लाल फुटे; तोंच करी, हाकाटी तुजसाठीं,
तुजविण कोण बरें, वारील, बाहय जडाचा खेळ ?
तुजवांचुन कोण, पेटविल, हृदयीं प्रेमविलो.?
बाहुल्यापणाला, तुझ्याविणें, चित्तहि उल्हासानें ?
लाल. पाहोनी. रक्तपताका गगनीं
फोडी हंबरडा, ही अवनी, दु:खित काकमुखांनी
जागा मी झालों, आईच्या त्या प्रेमळ रजनीच्या -

अपूर्ण

Translation - भाषांतर
N/A

References : N/A
Last Updated : 2016-11-11T12:52:49.8270000

Comments | अभिप्राय

Comments written here will be public after appropriate moderation.
Like us on Facebook to send us a private message.

DADHIVĀHANA(दधिवाहन)

RANDOM WORD

Did you know?

गणपतीची पूजा आणि व्रत फक्त पुरूषच करतात, मग फक्त स्त्रियांसाठी गणेश व्रत आहे काय?
Category : Hindu - Puja Vidhi
RANDOM QUESTION
Don't follow traditions blindly or ignore them. Don't assume a superstition either. Don't be intentionally ignorant. Ask us!!
Hindu customs are all about Symbolism. Let us tell you the thought behind those traditions.
Make Informed Religious decisions.

Featured site