भरलें घर ओकें ओकें - भरलें घर ओकें ओकें । मज न...

भरलें घर ओकें ओकें । मज न कळे दिसतें कैसें ?
मजभंवते जमले सगळे । स्वप्नीं परि बघतों जैसें;
ही दूध पाजिते ताई । परि वाटे घोटुं नयेसें,

स्फुंदूनि माय रडताहे,
समजावित भाऊ आहे,
ती रमा भयाकुल पाहे,
वैकल्य भरी हृदयातें । पाहूंच नये परि गमतें.

संवेदनशक्ती मेली । उघडेहि नयन मिटतात,
बघण्याचेही श्रम गमती । येई न विचार मनांत;
वरचेवर येतां ग्लानी । जणुं जीव बुडे गहनांत.

परिन लगे औषधपाणी,
मजसाठिं, नका रडूं कोणी,
सुख भोगा अपुल्या स्थानीं;
द्या आशीर्वाद मुलांतें । झोपेन सुखें मग एथें.

अस्फुट वच वदुनी ऐसें । झांकुनि घे थिजले डोळे;
देहावर जडता पसरे । परि नुसता हातच हाले;
नयनांवर सांचे पाणी । श्वासाची धमनी चाले;

मायेच्या हलकल्लोळीं
भंवतालीं गर्दी केली;
परि टाकुनि पंजर खालीं
दुखवूनि उडाला जीव । मायेचा हिरवा रावा.