भिकारी - किनरीवाला दारांत भिकारी आ...

किनरीवाला दारांत भिकारी आला ॥धृ०॥

मंजुळ सुंदर किनरी त्याची,
प्रेमरसाची आनंदाची,
लकेर घेई किति मौजेची
मोहविण्याला १

सुकदु:खाची चाड न याला,
मीतूंपण हा विसरून गेला,
नसे जगाची परवा हयाला
उद्धत झाला ! २

काळ्या काळ्या घन अंधारीं;
किंवा खरतर घोर दुपारीं
काढित बसतो मंद लकेरी
भुलवि जगाला. ३

वनामधें वा जनांत किंवा
गिरिशिखरीं प्रासादीं अथवा,
सुनील गगनीं दिशांमधें वा
बंध् न याला ! ४

समान सर्वां भूतीं पाहे,
प्रेमें बांधी विश्व सर्व हें,
समाधानरत सदैव राहे,
क्लेश न याला ! ५

लतिकांवरतीं फुलें पहातो,
बघतो, ह्सतो, मोहुनि जातो,
गान आपुलें सवेंचि गातो,
गुंगुनि गेला ६

समतेचें या वेड लागलें.
भेदाभेद पळोनी गेले,
म्हणोनि चाळे असले सुचले
हया वेडयाला ! ७