श्रीदत्त भजन गाथा - भजनयज्ञ रक्षणार्थ विनंती

प्रगटता येथे धरा । गुरुराया अत्रिकुमरा ॥१॥
विघ्नां आमुच्या निवारा । वैरी आमुचे संहारा ॥२॥
अनुष्ठान भजनाचे । सिद्ध करवावे साचे ॥३॥
नाम संकीर्तन यज्ञ । श्रेष्ठ म्हणताती तज्ञ ॥४॥
कलियुगी हेच सार । हेच पुण्य असे थोर ॥५॥
ऐसा आहे अभिप्राय । सकलांचा दत्तात्रेय ॥६॥
भजन यज्ञ सिद्ध करा । निज कृपे येथे उदारा ॥७॥
चापबाण घ्यावे हाती । यज्ञासाठी रमापती ॥८॥
रक्षण करा या स्थानाचे । रक्षण करा नाम यज्ञाचे ॥९॥
म्हणुनि पाय मी वंदितो पुन्हां पुन्हां मी प्रार्थितो ॥१०॥
नाथ प्रगट खचित व्हावे । निर्भय स्थान हे करावे ॥११॥
वैरी सर्व निवटावे । विघ्नांलागी मुळी नासावे ॥१२॥
भय मृत्यु निवारावी । क्षेमशान्ती आम्हां असावी ॥१३॥
निरामयता आम्हां दासां । सदा असो ह्रन्निवासा ॥१४॥
विनायक भरंवसा । तुमचाच जगन्निवासा ॥१५॥