तत्रादौ सूर्यदशाफलम् ।
रवेर्दशायामतितीक्ष्णभोज्यं प्राप्नोति मानोपचयं महान्तम् ।
धनानि चामीकरसंप्रशान्तं संजायते बन्धुसुखं शुभं च ॥१॥
सूर्यमध्ये सूर्यफलम् ।
बन्धूनां स्वान्तरे मानो बन्धूनां मरणं भवेत् ।
अत्यन्तरे चान्तरादौ सर्वमेव फलं वदेत् ॥२॥
सूर्यमध्ये चन्द्रफलम् ।
शत्रुनाशोऽर्थलाभश्च चिन्तानाशः सुखागमः ।
सूर्यस्यान्तर्गते चन्द्रे व्याधिनाशश्च जायते ॥३॥
सूर्यमध्ये भौमफलम् ।
प्रवालमुक्ताहेमादि धनं प्राप्नोति भूपतेः ।
रवेरन्तर्गते भौमे विभूतिः सुखमद्भुतम् ॥४॥
सूर्यमध्ये बुधफलम् ।
ग्रहवातव्याधिहानिर्द्रव्यनाशः कुलक्षयः ।
अविश्वासो भवेल्लोके रवेरन्तर्गते बुधे ॥५॥
सूर्यमध्ये शनिफलम् ।
महादुःखानि जायन्ते पुत्रमित्रविनाशनम् ।
रवेरन्तर्गते मन्दे शत्रुतश्च भयं भवेत् ॥६॥
सूर्यमध्ये गुरुफलम् ।
विपद्रोगविनाशश्च लक्ष्मीमेधासुखानि च ।
रवेरन्तर्गते जीवे शत्रुमङ्गलमुत्सवः ॥७॥
शोको भङ्गो महाभीतिर्विपत्तिरशुभं नृणाम् ।
रवेरन्तर्गते राहौ सर्वत्रामङ्गलक्रिया ॥८॥
रविमध्ये शुक्रफलम् ।
गात्रपीडा भयं त्रासो ज्वरातीसारशूलके ।
द्रव्यादिहानिं प्राप्नोति रवेरन्तर्गते सिते ॥९॥