शीर्षोदये विलग्ने मूर्द्धाप्रसवोन्यथोदये चरणौ । उभयोदये च हस्तो शुभदृष्टः शोभनेऽन्यथा कष्टः ॥१॥
सूर्यश्चतुष्पदस्थः शेषा द्विशरीरसंस्थिता बलिनः । केशैर्वेष्टितदेहौ यमलौ खलु स प्रसूयेते ॥२॥
क्रूरग्रहसंधिगते शशिनि वृषे भौमसौरिसंदृष्टे । मूकः सौम्यैर्दृष्टो वाचं कालान्तरे वदति ॥३॥
दक्षिणाङ्गे ग्रहाः सर्वे दीप्ता अस्तमितेक्षणाः । तस्य त्रिंशत्तमे वर्षे गजो द्वारेऽवतिष्ठति ॥४॥
चतुसागरगे चन्द्रे कोणे चैव दिवाकरे । अपि दासकुले जातः सोऽपि राजा भविष्यति ॥५॥
त्रिभिः स्वस्थैर्भवेन्मंत्री त्रिभिरुच्चैर्नराधिपः । त्रिभिर्नीचेर्भवेद्दासस्त्रिभिरस्तङ्गतैर्जडः ॥६॥