पापैस्तृतीयगैः सर्वैर्बान्धवै रहितो भवेत् । सौम्यैश्च भ्रातृसंयुक्तः कीर्तियुक्तो धनप्रियः ॥१॥
लग्नात्तृतीयभवने शिखिना सह चन्द्रमाः । लक्ष्मीवाञ्जायते बालो भ्रातृहीनो न संशयः ॥२॥
आदौ जातन् रविर्हन्ति पश्चाद्भौमशनैशरो । राहुणा च ह्युभौ हन्ति केतुः सर्वनिवारकः ॥३॥
स्वक्षेत्रैस्थो यदा राहुर्धनस्थाने बृहस्पतिः । बुधेन च समायुक्तस्तस्य बन्धुत्रयं भवेत् ॥४॥
लग्ने चन्द्रे धने शुक्रो व्यये च बुधभास्करौ । राहुश्चेत्पञ्चमे बालः स भवेद्भन्धुन्धकृत् ॥५॥
धनस्थाने यदा क्रूरो भौमः सौरिसमन्वितः । सहजे च भवेद्राहुर्भ्राता तस्य न जीवति ॥६॥
षष्ठे च भवने भौमः सप्तमे राहुसम्भवः । अष्टमे च यदा सौरिर्भ्राता तस्य न जीवति ॥७॥
विलग्नस्थो यदा जीवो धने सौरिर्यदा भवेत् । राहुश्च सहजे स्थाने भ्राता तस्य न जीवति ॥८॥
सप्तमे भवने भौमश्चाष्टमेऽपि सितो यदि । नवमे च भवेत्सूर्यः स्वल्पायुश्च समूर्जितः ॥९॥
तस्य भ्राता भवेदन्यः पिता चायं समुद्धरेत् । तस्य चैको भवेत्पुत्रः सोऽपि विघ्नं विनश्यति ॥१०॥
उदयति म्रुदुभांशे सप्तमस्थे च मन्दे यदि भवति निषेकः सूतिमब्दत्रयेण ।
शशिनि तु विधिरेष द्वादशाब्दे प्रकुर्यान्निगदितमिह चिन्त्यं सूतिकालेऽपि युक्त्या ॥११॥
पुंग्रहोच्चस्थितो यस्य पत्रिकायां नरस्य च । तस्य षष्ठो भवेद्धाता चान्यथा भगिनी भवेत् ॥१२॥