TransLiteral Foundation
Don't follow traditions blindly or don't assume a superstition either.
Don't be intentionally ignorant. Ask us!! Make Informed Religious Decisions!!
मराठी मुख्य सूची|मराठी पुस्तके|तुकाराम बाबा अभंग संग्रह|बोधपर अभंग|
५३६१ ते ५३७०

बोधपर अभंग - ५३६१ ते ५३७०

तुकारामबाबा आणि त्यांचे शिष्य यांच्या अभंगांची गाथा.


बोधपर अभंग - ५३६१ ते ५३७०
॥५३६१॥
खोळंबां ती मग तातडीची धांव । अंगा आणी भाव निश्चयाचा ॥१॥
ह्मणउनी बरी विचारावी चाली । उरे तेचि बोली कामा येती ॥२॥
कोरडें वैराग्य मांजिर तें खरें । शूरत्व उतरे अंगींचे तें ॥३॥
तुका ह्मणे नीट झर्‍याची ते चाली । सांठवण खोली कैसी याची ॥४॥

॥५३६२॥
प्रयाणाचे योगें वाटेवरी गंगा । जातां स्नान कांगा करुं नये ॥१॥
तीर्थवासीं तेणें आलिया पर्वणी । आळसें करुनी साधूं नये ॥२॥
क्षेत्रवास तया सहज असोन । देवाचें दर्शन घेऊं नये ॥३॥
तैसा विठोबाचा मुद्रांकित तुका । सांगे हिता तें कां ऐकूं नये ॥४॥

॥५३६३॥
क्षमा दया लोकां । अंतपार नाहीं लेखा ॥१॥
घरोघरीं लक्ष्मीवास । आला दरिद्राचा त्रास ॥२॥
नाहीं केलं जप तप । नरनारी सुखरुप ॥३॥
तुका ह्मणे कृपा केली । देवें मग ओंवाळिली ॥४॥

॥५३६४॥
अंगीं नाहीं स्वत:शक्ती । कांहीं भक्ति वैराग्य ॥१॥
तया कैसें घडे जाण । नाहीं मन हातीं तों ॥२॥
शांती इंद्रियाची झाली सर्व मेली वासना ॥३॥
कैसा होय ब्रह्म तेणें । हिंडे मन सैराट ॥४॥
तुक ह्मणे मिराशीचें । शेत ज्याचें वाहेना ॥५॥

॥५३६५॥
दुर्जनाचा संग आगीचें तें झाड । अंगा येती फोड लागतांचि ॥१॥
काय लाभ त्याचे शेजे बैसायाचा । वीट या देहाचा कां करावा ॥२॥
गूळ टाकोनियां वृंदावन खावें । ऐसें कां करावें तुका ह्मणे ॥३॥

॥५३६६॥
उद्धरल्या जाती । द्रव्ये रंगल्या पद्धती ॥१॥
बहु ह्मणवोनि फार । त्याचें असावें अंतर ॥२॥
कैंची पाठी पोट । गोड विषासी शेवट ॥३॥
तुका ह्मणे सोपा । नेणे कुरवाळिलें बापा ॥४॥

॥५३६७॥
जाणा वाण निवडिलें । ऐसें भलें वाईट ॥१॥
सारासार भरे पोटीं । खरें हातीं घेतलें ॥२॥
खरें खोटें वेळावेळ । हरीबळ जाणती ॥३॥
शुद्धाशुद्ध भाव नेणें । तुका ह्मणे मी एक ॥४॥

॥५३६८॥
पोटासाठीं लेकराची । प्रीत मानी समर्थाची ॥१॥
दाट बळें संत निंदा । करी नाइकावें सदा ॥२॥
पोटामध्यें पाळी कोण । पुढें अन्न देतें कोण ॥३॥
तुका ह्मणे पोट । भाग्यवंता घरीं भाट ॥४॥

॥५३६९॥
आलिया याचका ह्मणतां हो पुढें । आपुलें रोकडें सत्व जातें ॥१॥
काय कामभार घेऊनि मस्तकीं । हीनकर्मी लोकीं ह्मणावया ॥२॥
दारीं हाक कैसें करावें भोजन । रुची तरी अन्न कैसें देतें ॥३॥
तुका ह्मणे ध्वज उभारिला कर । ती शक्ति उदार काय झाली ॥४॥

॥५३७०॥
करावा संकोच आपणा भोंवता । होय तें बहुतां सुख किजे ॥१॥
देवाची ते पुजा भुतांचें पाळण । मत्सर तो शीण बहुतांचा ॥२॥
रुसावें फुगावें आपुलियावरी । उरला तो हरी सकळ ही ॥३॥
तुका ह्मणे संतपण याचि नांवें । जरी होय जीव सकळांचा ॥४॥

Translation - भाषांतर
N/A

References : N/A
Last Updated : 2019-04-04T19:40:37.8300000

Comments | अभिप्राय

Comments written here will be public after appropriate moderation.
Like us on Facebook to send us a private message.

घपकन

  • क्रि.वि. वासाचा - घाणीचा आकस्मिकपणा व विपुलता ध्वनित करणारीं . - क्रिवि . ( वास ध्वनित करणार्‍या शब्दांबरोबर योजतात . ) एकदम वास , घाण सोडून , कवाड उघडतांच घपकन वास आला . गपकन पहा . [ का . गब्बु = अतिशय वास ] 
RANDOM WORD

Did you know?

चंद्र व सूर्य यांच्या ग्रहणी जन्म झाल्यास त्याचे काय परिणाम होतात? शांती, विधी काही आहे काय?
Category : Hindu - Beliefs
RANDOM QUESTION
Don't follow traditions blindly or ignore them. Don't assume a superstition either. Don't be intentionally ignorant. Ask us!!
Hindu customs are all about Symbolism. Let us tell you the thought behind those traditions.
Make Informed Religious decisions.

Featured site