संगीत साध्वी मिराबाई

(८-२-१९३०) सं. : सवाई गंधर्व, हिराबाई, सुरेशबाबू माने, केशवराव भोळे

१
(राग : भीमपलास, ताल : त्रिवट)
रुचिरचि हा ल्याले भक्तिभाव । शुभ-गुण-मणि अलंकार ॥धृ०॥
प्रभुला पुजिले या मनमंदिरीं । तनमनधन पदिं वाहिले ॥

२
(राग : बागेश्री, धुमाळी)
त्राता प्रभु सकलांचा । हा अंतरिचा साचा दृढ भाव निरंतरचा ॥धृ०॥
नच जिवास आसरा । प्रभुवाचुनि दुसरा ।
घेतचि स्वजनांचा तो भोर शिरीं सारा ॥

३
(राग : पिलु, ताल : कवाली)
ब्रिजलाला गडे पुरवी ह्रदयिंची आस ॥धृ०॥
वाजिव श्रीहरी । मंजुळ बासरी । पाजिव शांति सुधा जीवास ॥

४
(राग : भैरवी, ताल : दादरा)
असार पसारा शून्य संसार सारा ।
हा प्रभुराजा जीवासि एक निवारा ॥धृ०॥
मज निरोप द्यावा ठेवुनि प्रेमभावा ।
सकल चरणिं माझा हा नमस्कार घ्यावा ।
सफल जनन झाले, सेविलें सौख्य सारा ।
प्रभु चरण विलीना जाहली आज मीरा ॥१॥