(बलिकर्म)
देवानां स्वपदस्थानां बलिकर्म विधीयते ।
सामान्याहत्यमार्गेण ब्रह्मादीनां यथाक्रमम् ॥१॥
आहत्यबलिः
गन्धमाल्यैश्च धूपेन पयसा मधुसर्पिषा ।
पायसौदनलाजैश्च ब्रह्मस्थानं समर्चयेत् ॥२॥
आर्यके फलभक्ष्यं स्यान्माषान्नं च तिलानि च ।
विवस्वति विनिक्षिप्तं दधि दूर्वा च मित्रके ॥३॥
महीधरे भवेद् दुग्धमेवमन्तर्बलिः स्मृतः ।
पर्जन्यस्याज्यमैन्द्रस्य नवनीतं सपुष्पकम् ॥४॥
इन्द्रे कोष्ठं च पुष्पं च मधु कन्दाश्च भास्करे ।
सत्यके मधुकं दद्याद् भृशाय नवनीतकम् ॥५॥
माषं रजनिचूर्णं च गगनस्य बलिं ददेत् ।
दुग्धाज्यं तगरं वह्नेः शिम्बान्नं पूष्णि पायसम् ॥६॥
कङ्क्वन्नं वितथे शीधु राक्षसे बलिरिष्यते ।
शिम्बान्नं कृसरं याम्ये गन्धर्वेऽखिलगन्धकम् ॥७॥
भृङ्गराजेऽब्धिमत्स्यः स्यान्मृषे मत्स्यौदनं विदुः ।
निऋतौ तैलपिण्याकं बीजं दौवारिके बलिः ॥८॥
सुग्रीवे मोदकं पुष्पदन्तके पुष्पतोयकम् ।
वरुणे पायसं धान्यं शोणितेनासुरे बलिः ॥९॥
सतिल तण्डुलं शोषे रोगे स्याच्छुष्कमत्स्यकम् ।
स्विन्नं हारिद्रकं वायौ नागे मद्यं च लाजकम् ॥१०॥
धान्यचूर्णं हि मुख्यस्य दधि सर्पिश्च सम्मतम् ।
गुलौदनं तु भल्लाटे सोमे दुग्धौदनं ददेत् ॥११॥
शुष्कमांसं मृगे दद्याद् देवमातरि मोदकम् ।
उदितौ तिलभक्ष्येण क्षीरान्न सर्पिरीशके ॥१२॥
लाजं धान्यं सविन्द्रस्य साविन्द्रे गन्धतोयकम् ।
बस्तमेदस्तथा मुद्गचूर्णमिन्द्रेन्द्रराजयोः ॥१३॥
रुद्रे रुद्रजये मांसं स्विन्नमापापवत्सयोः ।
कुमुदं मत्स्यमांसं च शङ्खकच्छपमांसकम् ॥१४॥
मद्यमाज्यं चरक्यास्तु विदार्या लवणो बलिः ।
पूतनायास्तिलं पिष्टमन्याया मुद्गसारकम् ॥१५॥
साधारणबलिः
साधारणबलिःशुद्धभोजनं सघृतं दधि ।
सर्वेषामपि देवानां गन्धादीनि ददेत् क्रमात् ॥१६॥
कन्यका वाऽथ वेश्या वा बलिधारणयोग्यकाः ।
अङ्गन्यासकरन्यासेः पूतचेता यथाक्रमम् ॥१७॥
ओङ्कारादिनमोऽन्तेन स्वस्वनामाभिधाय च ।
दत्वा पूर्वं जलं पश्चात् साधारणबलिं ददेत् ॥१८॥
तत्तद्योग्यबलिं पश्चाद् देयं तोयं तथा बुधैः ।
ग्रामादीनां तु मण्डूकपदे परमशायिके ॥१९॥
सन्तर्प्य देवता ह्येवं पूर्वोक्तविधिना क्रमात् ।
विसर्जयेत्ततो देवान् विन्यासार्थं तु मन्त्रवत् ॥२०॥
ब्रह्माणं बाह्यदेवांश्च तत्तदुक्तपदे न्यसेत् ।
देवालयविधानार्थं द्वारार्थं ते प्रकीर्तिताः ॥२१॥
शेषाश्च निष्पदाः सर्वे रक्षार्थ तु निवेशिताः ।
एवं ग्रामादिषु प्रोक्तं रहस्यमिदमीरितम् ॥२२॥
कृतोपवासः स्थपतिः प्रभाते
विशुद्धदेहोऽविकलं गृहीत्वा ।
विशेषसामान्यबलिं सुराणां
यथोक्तनीत्या विदधीत सम्यक् ॥२३॥
इति मयमते वस्तुशास्त्रे बलिकर्मविधानो नामाष्टमोऽध्यायः