पद - तुळजाबाई

( चाल : असा धरि छंद. )
तुळजाबाई ! ये धांवत माझे आई ! ॥ध्रु०॥
सकळ तूं विश्वाची माउली । श्रमितजन कल्पद्रुमसाउली
चिन्तितां बहुतांला पावली । देति श्रुति ग्वाही ॥ ये धांवत० ॥१॥
पुराणें म्हणति शोध लागला । दिनांची थोर काळजी तुला
हें सत्य प्रत्यया मला । येत कां नाहीं ? ॥ ये धांवत० ॥२॥
विषादें लपविसि तारकपाय । पतित मग भवनिधि तरतिल काय
क्षमा कर शतकोटी अन्याय । लागतों पायीं ॥ ये धांवत० ॥३॥
शरण मीं आलों कुलस्वामिनी ! तुझे गुण सकल गुणांहुनि गुणी
खुंटते ब्रह्माची लेखणी । आटली शाई ॥ ये धांवत ॥४॥
विष्णुदासास दान दे जुनं । वांचवी प्रेमामृत पाजुन
कथा किति गाउं अशा मोजुन । तुझ्या तुकाई ॥ ये धांवत० ॥५॥