श्रावणमास - श्रावणमासीं हर्ष मानसीं ह...

श्रावणमासीं हर्ष मानसीं हिरवळ दाटे चोंहिकडे;
क्षणांत येतें सरसर शिरवें क्षणांत फिरूनी ऊन पडे.

वरती बघतां इंद्रधनूचा गोफ दुहेरी विणलासे,
मंगल तोरण काय बांधिलें नभोमंडपीं कुणि भासे !

झालासा सूर्यास्त वाटतो सांज अहाहा ! तों उघडे
तरुशिखरांवर, उंच घरांवर पिवळेंपिवळें ऊन पडे

उठती वरतीं जलदांवरतीं अनंत संध्याराग पहा;
सर्व नभावर होय रेखिलें सुंदरतेचें रूप महा.

बलाकमाला उडतां भासे कल्पसुमांची माळचि तें,
उतरुनि येती अवनीवरती ग्रहगोलचि कीं एकमतें

फडफड करूनी भिजले अपुले पंख पांखरें सांवरिती
सुंदर हरिणी हिरव्या कुरणीं निजबाळांसह बागडती

खिल्लारें हीं चरती रानीं, गोपहि गाणीं गात फिरे,
मंजुळ पावा गाय तयाचा श्रावणमहिमा एकसुरें

सुवर्णचम्पक फुलला, विपिनीं रम्य केवडा दरवळला;
पारिजातही बघतां भामारोप मनींचा मावळला !

सुंदर परडी घेउनि हातीं पुरोपकंठीं शुद्धमती
सुंदर बाला या फुलमाला रम्य फुलें - पत्री खुडती,

देवदर्शना निघती ललना, हर्ष माइना हृदयांत,
वदनीं त्यांच्या वाचुनि घ्यावें श्रावण महिन्याचें गीत !