नमो पांडुरंगा ! नमस्ते श्रीरंगा । रुक्मिणीच्या रंगा नमोनमः ॥१॥
सर्वा मंगळाचा एकरुप निधि । तूंच देवा विधि-हरिहर ॥२॥
ऐकिल्या देवांच्या तेहतीस कोटी । तीं रुपें गोमटीं देवा तुझीं ॥३॥
निर्गुणाचें ब्रह्म सगुणाची मूर्त । दोहीं ठायीं कीर्त एका तुझीं ॥४॥
म्हणे ’x x ’ अगा पंढरीच्या देवा । अनामिक सेवा घ्यावी आतां ॥५॥
१.
कवित्वाचा येथें वाहिला मीपणा । लक्ष्मीनारायण तुझे पायीं ॥१॥
गणांमात्रांचा तो नको ताळेबंद । नको वृत्त छंद नाम गाया ॥२॥
विना कानामात्रा आणिक वेलांटी । लेखन-कामाठी मांडिली हे ॥३॥
साहित्याची कळा झाली तिर्‍हाईत । शुद्धाशुद्धातीत नाम तुझें ॥४॥
म्हणे ’x x ’ जें जें मनीं मुखीं आलें । तें तें येथ झालें ब्रह्मार्पण ॥५॥
२.
क्षणमात्र थांबा असंगाच्या संगा । अहो पांडुरंगा कृपावंत ॥१॥
मनाचा मुहूर्त साधुनि हा आज । सोडूनिया लाज बोलतों मी ॥२॥
माझ्यावरी मीच मांडीन फिर्याद । तुझ्यापायीं दाद मागावया ॥३॥
नका देवराया धरुं भीडभाड । कराल तो निवाड मान्य आहे ॥४॥
म्हणे ’x x ’ देवा रखुमाईच्या कांता । परी दूर आतां नका राहूं ॥५॥
३.
जीवेंभावें देवा आम्ही अमंगळ । जातीचे चांडाळ, थोर नांवें ॥१॥
पांडुरंगा आम्ही युगांचे दुर्जन । क्षणाचे सज्जन पश्चात्तापें ॥२॥
व्रत एकादशी मात्र हें देहाशीं । नित्य मनापाशीं दिवाळीच ॥३॥
नांवाचेच साव आम्ही थोरथोर । मनाचे हे चोर सर्वकाळ ॥४॥
तुझे पायीं आतां चोरी नसे कांहीं । म्हणे ’x x ’ नाहीं भयभीत ॥५॥
४.
मागायाची आहे मेख । तुजपाशीं हीच एक ॥१॥
सुखदुःखें हीं केवळ । जन्मा आलियाचें फळ ॥२॥
इंद्राचंद्रा कर्मरेखा । तेथें माझी कोण लेखा ? ॥३॥
हेंचि एक द्यावें दान । घडी कांहीं तुझें गान ॥४॥
म्हणे ’x x ’ हीनदीन । मृगजळींचा हा मीन ॥५॥
५.
नाहीं भक्तिभाव नीट । तरी हांक मोकली तो धीट ॥१॥
नाहीं मुक्तीचा हव्यास । नसे नामाचाही ध्यास ॥२॥
नेमधर्म कोणा ठावा । एकरुप उजवाडावा ॥३॥
तुम्ही यावें आम्हांसाठीं । कवित्वही न ऐसें गांठीं ॥४॥
म्हणे ’x x ’ हांके साच । अधिकार पाप हाच ॥५॥
६.
आला गोपगोपींसाठीं । देवा तुम्ही यमुनाकांठीं ॥१॥
पुंडलिका द्याया भेटी । देव आले वाळवंटीं ॥२॥
नामयाच्या कारणीं । राउळाचीही फिरवणी ॥३॥
दामाजीच्या संकष्टीं । विठू धेड होई कष्टी ॥४॥
म्हणे ’x x ’ मायबापा । भीशी काय माझ्या पापा ॥५॥
७.
धन्य धन्य माझें पाप । तुज आणिल आपोआप ॥१॥
माझ्या पातकांची रास । देवा पाडील इरेस ॥२॥
"आजवरी थोरथोर । पायीं नेले पतित घोर-॥३॥
परि याचें पाप फार । पाहूं होतो का उद्धार" ॥४॥
म्हणे ’x x ’ ऐशा भरीं । देवा याला माझ्या घरीं ॥५॥
८.
नेघे देवा तुझ्या नांवा । तुझा माझा उभा दावा ॥१॥
नामें उद्धरिले सारे । मीच एक राहिन बा रे ? ॥२॥
तुझ्या नांवा गालबोट । सुखें खावे दांतओठ ॥३॥
पाहूं बोलाविल्यावीण । हरी का तें माझा शीण ॥४॥
देवा तुझी घ्याया लाज ॥ ’x x ’ ठाकलासे आज ॥५॥
९.
काय महिमा नामांकित । आज दाखवा प्रचीत ॥१॥
पूर्वीं नांव झालें फार । नको त्याचा बडिवार ॥२॥
दाविं मज प्रत्यय कांहीं । नको संतांची ग्वाही ॥३॥
देणेंघेणें हातोहात । उधारीची नाहीं बात ॥४॥
धन्य ’x x ’ भाग्यवंत । देवा तुझा पाही अंत ॥५॥
१०.
काळयवनाच्या भेणें । दडी पाण्यापोटीं देणें ॥१॥
धाकें आणि दैत्याच्याच । मोहिनीचा केला नाच ॥२॥
काच बळीचा अगोचर । देवा झाला मूठभर ॥३॥
परि येतां पापें माझीं । कुठें दडला देवाजी ? ॥४॥
म्हणे ’x x ’ धीटपाठ । येथें अस्सलाशीं गांठ ॥५॥