उद्धवास क्षेम पुसे यशोदा सती ॥
असति सुखी रायकृष्ण सांग मजप्रती ॥उद्ध०॥धृ०॥
धरून पायि हरिस इथे नाहु घातले ॥
घेउन कडे कवल करी यास भरविले ॥
गीत गात पालकात बाळ निजविले ॥
मृत्तिका तो भक्षिता मि मारिले किती ॥उद्ध०॥१॥
अरुण उदयि धेनुसंगे धाडिला वनी ॥
गार्हाणी गोपिकांचे सत्य मानुनी ॥
हरिस उखळि बांधियले आठवे मनी ॥
त्रिभुवनि मज सम हि नसे अन्य माय ती ॥उद्ध०॥२॥
नंदअंगणात गोपि येति धाउनी ॥
उद्धवजी निरोप असा सांग जाउनी ॥
खरिद कुठे केलि हरी नवरि पाहुनी ॥
झालि कशी तुजसि अता कुबडि अवडती ॥उद्ध०॥३॥
कुंजवनी कृष्णनाथ रास खेळता ॥
भाषदान देउनिया करिसि का वृथा ॥
जाय तुझा थोरपणा श्रीहरी आता ॥
कर जोडुन कृष्णा त्या झालि विनविती ॥उद्ध०॥४॥