सप्ताह अनुष्ठान - अहंताविष

अहंकार दोष माझे ह्र्दयांत । प्रबळ वर्तत किती सांगूं ॥१॥
त्याचीया संगाने पाऊलो पाऊली । दुष्टता ये भली मजलागी ॥२॥
किती चुकतो मी अंदाज करवेना । पश्वाताप मना झाला असे ॥३॥
नम्रभावे आतां तुम्हांसी प्रार्थितो । पदर पसरितो कृपा करा ॥४॥
तुम्हांसम नाही कोणीही कृपाळू । माझा प्रतिपाळू करा, नाथा ॥५॥
सांपडलो आहे बहु अरिष्टांत । कांही न उमजत मजलागी ॥६॥
गोंधळले मन , मार्ग गवसेना । उपाय कळेना कांही मना ॥७॥
झालो आहे अंध नेत्र असोनियां । दिसेना गुरुराया मज मार्ग ॥८॥
कान असोनियां बहिरा बनलो । मूक असे झालो दोषांमुळे ॥९॥
जरी वाचा मज, कांही बोलवेना । ऐकाया येईना बोधवच ॥१०॥
आंधळा बहिरा मोना मी जाहलो । ठायींच बैसलो ठाकोनियां ॥११॥
अहंकारे मज अनाथ बनविले । नि:शक्त की केले मजलागी ॥१२॥
अहंकार विष उग्र हे प्रखर । जाहला विस्तार शरीरांत ॥१३॥
तेणे माझे दोन्ही डोळे हे फ़ुटले । कानही फ़ुटले देवा माझे ॥१४॥
जीभ माझी नाथा लुली हे पडली । कोरड जाहली घशामाजी ॥१५॥
अहंकार विष दाटले कंठांत । तेणे गुदमरत जीव माझा ॥१६॥
मरणकाळ ऐसा देवा हा पातला । शरण तुम्हांला म्हणोनियां ॥१७॥
तुम्ही पंचाक्षरी तुम्ही धन्वंतरी । वांचवावे तरी मज आतां ॥१८॥
विनायक घेतो चरणि लोळण । विषाचे शोषण करा नाथा ॥१९

धांवा
संकटांत नाही कोणी वांचविता । होय उपहास्यता थोर माझी ॥१॥
सोंगे ढोंगे कैसे नाम मी गाइले । पाहिजे आतां आले कामालागी ॥२॥
लाज राखा माझी पत राखा माझी । अब्रु राखा माझी कृपावंता ॥३॥
तुमच्या यशाची दिधली मी ग्वाही । सत्यता लवलाही घडो आतां ॥४॥
आजवरि केले नामसंकीर्तन । गुणाचे गायन विनयाने ॥५॥
श्रद्धेच्या प्रसादे देवा मी जनांत । राहिलो वर्णीत यश तुझे ॥६॥
अल्प जी का सेवा मज घडविली । पाहिजे ती आली फ़ळालागी ॥७॥
संकटे ही माझी नाथ नष्ट करा । मजलागी तारा कृपावंता ॥८॥
विनायक आहे तुम्हां प्रियदास । तरी आतां खास वांचवावा ॥९॥