सप्ताह अनुष्ठान - भक्तकीर्तिने देवयशाचा विस्तार

माझी कीर्ति होतां यश विस्तारेल । चरित्र गातील तूझे संत ॥१॥
कांचेचा तूं हिरा जरी बनविसी । तुझिया कीर्तिसी वाढ होई ॥२॥
दगडाचे सोने करोनी दाविसी । जरी ह्रषिकेशी निजकृपे ॥३॥
तरिच साधुसंत गातील तुजला । लोक विश्वासाला धरितील ॥४॥
दिव्य घडावण ऐशी माझी देवा । जरी तूं माधवा करिशील ॥५॥
लोकांचिये नेत्रां चित्र हे दिसेल । तयां उपजेल दृढ श्रद्धा ॥६॥
तेणे तूझे कार्य सिद्धीसी पावेल । जनसंघ लागेल भजनासी ॥७॥
लोकसंग्रहार्थ साधी भगवंता । मदीय सिद्धता साधी आतां ॥८॥
मज सिद्ध करी जगतासि दावी । आपुली थोरवी कृपावंता ॥९॥
भजनमाहात्म्य जनी प्रगट व्हावे । श्रीगुरुबरवे ऐशा योगे ॥१०॥
विनायक म्हणे मज गरिबाची । वाणी सत्य साची करावीच ॥११॥