अर्जुन देशमुख - तिचे सांडतात डोळे, त्याने...

तिचे सांडतात डोळे, त्याने शहारते माती
हिरव्या आठवांच्या खुणा चिंब आसवांत न्हाती

तिचे सांडतात डोळे त्याने शहारते भुई
तिच्या घामाने रुजते मातीमध्ये जाई - जुई
साद आईची ऐकून हिरवी थरारती पाती

जात्यावर दळताना भरडले आयुष्याला
तिने कंठातला शब्द पीठ होऊन पाळला !
उभ्या घरा - दारासाठी तिने जागवल्या राती

लिंपताना घर - दार शेणा - मातीला सुवास
चंदनाच्या गाभ्यातले माझ्या आईचे रे श्वास
माय चंदनच झाली, झाली सुगंधित माती !