चंद्रशेखर सानेकर - मुळीच नाही माझ्याविषयी सं...

मुळीच नाही माझ्याविषयी संभ्रमात मी
जो काही आहे तो आहे जन्मजात मी

रिकामेच ते होते जेव्हा पकडले तुला
भरू कशाला गोळ्या नंतर पिस्तुलात मी !

देवच आला गप्पा मारत इथे घेउनी
नाहीतर जातोय कशाला देवळात मी !

एके दिवशी किरणे फुटली बोटांमधुनी
हात घातला होता कुठल्या विस्तवात मी ?

मासा बनलो मी दु:खाच्या सागरातला
अता काय बुडणार कुणाच्या सांत्वनात मी !

नव्या युगाचे अन्न खाउनी खुरटलो असा
जिवंत आहे केवळ माझ्या अवयवात मी !

कधीतरी होणारच माझा जंगली पशू
आज उपाशी फिरतो आहे माणसात मी

चिडतो होतो...तसाच गेलो आरशापुढे
नाहीतर देणार कुणाच्या मुस्कटात मी !