प्र. सतीश देवपूरकर - एकाच तुझ्या दुःखाने जन्मा...

एकाच तुझ्या दुःखाने जन्माची सोबत केली !
तू नव्हे, तुझ्या स्वप्नाने जन्माची सोबत केली !

तू झुळुक कोवळी बनुनी बिलगलीस मज त्या रात्री
पळभरच्या सहवासाने जन्माची सोबत केली !

वळणावर अवघड एका सोबती पळाले सारे
पण त्याच बिकट रस्त्याने जन्माची सोबत केली !

संपला चार दिवसांचा दीपोत्सव आयुष्याचा
मग एका काळोखाने जन्माची सोबत केली !

पकडून बोट वार्‍याचे तो सुगंध निघुनी गेला...
पण रुतलेल्या काट्याने जन्माची सोबत गेली !

वाटेवर अर्ध्या झाला घायाळ पंख सोनेरी
पण मातीच्या पायाने जन्माची सोबत केली !

ते दिवस गुलाबी गेले...काळाच्या पडद्यामागे
पण स्मरणांच्या गंधाने जन्माची सोबत केली !

वठलेल्या झाडावरती बहराची एक निशाणी
पिकलेल्या त्या पानाने जन्माची सोबत केली !

वळचणीसही कोणाच्या आसरा मिळाला नाही
भिरभिरणार्‍या वार्‍याने जन्माची सोबत केली !

कापली याच बळावर अंतरे प्रकाश्वर्षाची...
आशेच्या त्या किरणाने जन्माची सोबत केली !