उमाकांत मालवीय - बाहीचे ह्या तुटेबटण सदर्...

बाहीचे ह्या तुटेबटण
सदर्‍याची उसवली शिवण

तुझी आठवण पदोपदी येण्याचे हे प्रसंग सारे

पुटे धुळीची मेजावरती
शिळ्या फुलांची ही फुलदाणी
इथे तिथे विखरुन पडलेली
कितिक पुस्तके केविलवाणी

शिणलेले - थकलेले हे तन
संवादास्तव आसुसले मन

तुझी आठवण पदोपदी येण्याचे हे प्रसंग सारे

रुमाल मळका किती दिसांचा
कुठे ठेवली किल्ली न कळे
कुंकुमरेखेविनाच ऐना
जागेवरती वस्तू न मिळे

माजघराची धुरकट घुसमट
मिठू मिठू हा बोले पोपट

तुझी आठवण पदोपदी येण्याचे हे प्रसंग सारे
कुणा कथावी तडफड, तगमग
दाढी करताना गाल चिरे
लावलास ना गुलाब तू जो
फूल त्यावरी पहिले बहरे

प्रतीक्षेतले पत्राच्या क्षण
मधुगुंगीचा दंश विलक्षण

तुझी आठवण पदोपदी येण्याचे हे प्रसंग सारे