ऋचा कर्वे - आताशा ती नाही काढत मोर्चे...

आताशा ती नाही काढत मोर्चे वगैरे
नाही घालत कुठंही, कुणाशीही कसलेच वाद...
वर्तमानपत्रातल्या बातम्यांनीही पूर्वीसारखी
आंतर्बाह्य पेटून उठत नाही ती...

अन्याय, स्वत:चं डावललं गेलेलं प्रमोशन,
असं सगळंच सहजपणे स्वीकारते ती..
मग  असू देत ते घरातलं, आँफिसातलं, बँकेतलं, शाळेतलं
कुठल्याही कचेरी-कार्यालयातलं...असं कुठलंही...
आणि असू देत ती कार्यरत कुठल्याही हुद्दयावर...
अन्‍ असू देत कुठल्याही वयोगटातली

मोह-माया, मत्सर, लोभ, असूया, हेवे-दावे
याही पलीकडं जाऊन ती रमलीय
आता फक्त तिच्या मोबाईलमधल्या
‘कँडीक्रश’मध्ये...
भराभर पार करतेय ती त्यातल्या
लेव्हल्स
त्यातल्या अवघड आव्हानांसकट...
अन्‍ त्यातच हरवून गेलीय ती...
तिचा सगळा भोवताल विसरुन... !