डॉ. स्मिता पाटील - उगमापाशी पुन्हा कधी ना पर...

उगमापाशी पुन्हा कधी ना परतुन येते नदी
पुढे पुढे ही सारखी वाहत जाते नदी

कधी भेटती कठीण कातळ
कधी लाभते माती प्रेमळ
राग न कसला, न कसली खळखळ...हसत राहते नदी

बीजामधुनी प्राण फुंकते
पालन करते, पोषण करते
कर्तव्याला कधी आपुल्या कधी न चुकते नदी

हिरवी वस्त्रे कधी भरजरी
कधि काट्यांच्या तीक्ष्ण पंजरी
घाव लपवते उरात सगळे, पण ना उदास होते नदी

जुने पाश ती सहज तोडते
नवीन नाती सहज जोडते
गहन - गूढ सागरी समर्पित होउन जाते नदी

दु:ख कुणा ना सांगत फिरते
सहजच सारे सोसत जाते
नवे क्षेत्र; तरिही रमते...स्त्रीजन्माचे गूज सांगते नदी !